Мўғулистон Путиннинг ташрифини тушунтириши керак бўлади – ХЖС прокурори

Мўғулистон нега Халқаро жиноий суд буйруғини эътиборсиз қолдирганини тушунтириши керак. Бу ҳақда  ХЖС прокурори Карим Хон BBC’га берган интервьюсида сўз очди. 

“Суд даражасида музокаралар давом этмоқда. Судьялар ўз тавсияларини беришлари мумкин, агар ҳамкорлик бўлмаса, мен ҳеч нарсани олдиндан тахмин қилмоқчи эмасман, чунки бу масала судьялар ва Мўғулистон ҳукумати ўртасида ҳал қилинмоқда”, дейди прокурор.

Карим Хон эртами-кечми Россия Президенти Владимир Путиннинг Гаагадаги судлов маҳкамасига тушишига шубҳа қилмаслигини айтди. Прокурор ўтмишдаги кўплаб нуфузли шахслар судга тортилганини эслади. У собиқ Югославиянинг сиёсий раҳбарларини мисол қилиб келтирди.

“Собиқ Югославия трибунали Каражич ва Младични ҳибсга олишга ордер беришни сўраганда, Милошевич ҳақида гапирмаса ҳам бўлади, Серра-Леоне бўйича махсус суди собиқ президент Чарлз Тейлорни ҳибсга олишга ордер берганида, одамлар кулишди. Лекин тарих кўрсатганидек, ўтмишда ўз мамлакатида ва минтақасида катта кучга эга бўлган бу одамлар охир-оқибат судлов маҳкамасида ўтиришди. Мисоллар борки, агар кимдир юқори масъулият билан чекланмаган кучдан фойдаланган ҳолда ўзи хоҳлаганини қилса, унинг манёвр майдони тораяди”, дейди Карим Хон.

Хоннинг сўзларига кўра, Путинни ҳибсга олишга ордер бериш қийин бўлмаган.

“Воқеа содир бўлган жойга ташриф буюрдим ва сиз ҳикоялар, гувоҳликларни эшитганингизда, вайронагарчиликни кўрганингизда, турли одамларнинг баёнотларини, шу жумладан Владимир Путин ва Львова-Белованинг баёнотларини эшитганингизда, қонуннинг тўлиқ қатъийлигини қўллаш қийин эмас эди”, деб тушунтирди ХЖС прокурори.

2023 йилнинг март ойида Халқаро жиноий суд Путин ва Россиядаги болалар ҳуқуқлари бўйича комиссари Мария Львова-Беловани ҳибсга олишга ордер берган эди. Улар Украинадаги уруш пайтида содир этилган ҳарбий жиноятларда гумон қилинмоқда. Москва ХЖС қарорини қонуний асоссиз деб атади ва Россия Тергов қўмитасининг ўзи ХЖС прокурори ва судьяларига қарши жиноий иш қўзғатди. Тергов қўмитаси Путиннинг таъқиб қилиниши “шубҳасиз ноқонуний” эканини айтди.

Бу ордер туфайли Владимир Путин Рим низомини имзолаган давлатларга саёҳат қилишдан бош тортиши ва шу тариқа ХЖС буйруқларини бажариш мажбуриятини олган. Шундай қилиб, 2023 йил июль ойида у Жанубий Африкадаги BRICS саммитига бормади, гарчи мамлакат расмийлари уни ҳибсга олмасликларини аниқ билдирган.

Бу ҳафта Россия Президенти Рим низомига қўшилган Мўғулистонга ташриф буюрди, бироқ ҳибсга олиш ўрнига Путинни қизил гилам йўлакчаси билан кутиб олишди.