Муфтий Холиқназаровга янги ўринбосар тайинланди

Ўзбекистон мусулмонлари идораси раиси, муфтий Шайх Нуриддин Холиқназаровга янги ўринбосар тайинланди. Бу ҳақда идора матбуот хизмати хабар берди. 

Маълум қилинишича, бугун, 23 ноябрь куни Имом Бухорий номидаги Тошкент ислом институти ректори, профессор Муҳаммадолим Муҳаммадсиддиқов эгаллаб турган вазифасидан ажралмаган ҳолда Ўзбекистон мусулмонлари идораси раисининг Ёшлар ишлари бўйича ўринбосари лавозимига тайинланган. 

Муҳаммадсиддиқов Имом Бухорий номидаги Тошкент ислом институти, Мисрдаги Қоҳира давлат университети ва Тошкент давлат шарқшунослик институтини тамомлаган.

У фаолияти давомида Дин ишлари бўйича қўмита бўлим бошлиғи, Ўзбекистон халқаро ислом академияси проректори, кафедра мудири вазифаларида меҳнат қилган.

Сиёсий фанлар доктори (DSc), профессор Муҳаммадолим Муҳаммадсиддиқов 2023 йил январь ойидан ҳозирга қадар Имом Бухорий номидаги Тошкент ислом институти ректори вазифасида фаолият юритиб келмоқда.