Москвадаги портлашда гумондорнинг ўзи ҳам ҳалок бўлган – ОАВ

Олам

image

Кеча, 3 февраль куни Россия пойтахти Москвадаги “Алые паруса” тураржой мажмуасида юз берган портлашда жароҳатланган “АрБат” алоҳида махсус бўлинмалари батальонининг асосчиси Армен Саркисян шифохонада вафот этганди. Дастлабки маълумотларга кўра, мажмуада содир бўлган портлашни содир этган эркакнинг ўзи ҳам ушбу жараён давомида ҳалок бўлган. Бу ҳақда фавқулодда хизматларга таяниб, ТАСС хабар берди.

Қайд этилишича, ушбу портлашни содир этган шахс кимлиги ҳалигача аниқланмаган. 

“Дастлабки маълумотларга кўра, Саркисянни ўлдириш учун портловчи мосламани ишга туширган шахс воқеа жойида вафот этган. Унинг шахси аниқланмоқда. Тергов қотилликнинг жиноий версияси устида ишламоқда”, дейилади хабарда.

Ҳуқуқ-тартибот идораларининг маълум қилишича, тергов Саркисяннинг ўлдирилишининг бир қанча сабабларини, жумладан, шахсий қасосни ҳам кўриб чиқмоқда. 

Маълумот учун, Саркисян Горловканинг фахрий фуқароси, у ёшлигида Арманистондан Донбассга кўчиб ўтган. 2022 йилда Донбассда у бошчилигида “АрБат” ёки арман батальони Россиянинг Украинага босқинида иштирок этиш учун тузилган. Бу “Пятнашка” халқаро бригадаси таркибидаги махсус кучлар бўлинмаси саналади. 

Эслатиб ўтамиз, 2024 йил 17 декабрь куни эрталаб Москванинг Рязанский туманидаги тураржой биносига киравериши ёнида турган самокатга ўрнатилган портловчи қурилма ишга туширилиши оқибатида Россия Қуролли кучларининг Радиация, кимёвий ва биологик ҳимоя қўшинлари бошлиғи генерал-лейтенант Игорь Кириллов ва унинг ёрдамчиси Илья Поликарпов ҳалок бўлганди. Суиқасдда гумон қилиниб, ўзбекистонлик 29 ёшли Аҳмад Қурбонов ушланган. Январь ойида генералнинг ўлдирилишида гумон қилинган яна икки киши – Рамазон Падиев ҳамда Ботухон Тожиев ҳибсга олинди.


Мақола муаллифи

Теглар

Москва портлаш Армен Саркисян

Баҳолаганлар

0

Рейтинг

3

Мақолага баҳо беринг

Дўстларингиз билан улашинг