Москвада “Крокус” теракти бўйича суд бошланди

Москва шаҳридаги Иккинчи Ғарбий округ ҳарбий суди Москва яқинидаги “Крокус Сити Ҳолл” концерт залида содир этилган теракт бўйича жиноий ишнинг мазмун-моҳиятини кўриб чиқишни бошлади. Бу ҳақда “Интерфакс” хабар берди.

Судья бугун, 4 август куни ишни кўриш бошланганидан сўнг давлат қораловчисининг илтимосига биноан суд мажлислари ёпиқ эшиклар ортида ўтказилишини маълум қилди.

“Прокуратура тергов сирини сақлаш ва суд мажлиси иштирокчилари хавфсизлигини таъминлаш зарурлигини асослаб, суд жараёнини ёпиқ ўтказишни талаб қилди”, деб ёзади “Интерфакс”.

Бу ишда жами 19 нафар айбланувчи бор, улар орасида фожиадан кейинги биринчи куннинг ўзидаёқ ҳибсга олинган Далержон Мирзоев, Саидакрам Ражабализода, Шамсидин Фаридуни ва Муҳаммадсобир Фаизов каби ҳужумда гумонланаётганлар бор. Улар террорчилик ҳаракатини содир этиш, террорчилик фаолиятига ёрдам бериш, шунингдек, террорчилик фаолиятини амалга ошириш мақсадида тайёргарликдан ўтиш ва бошқа жиноятларда айбланмоқда.

“Суд мажлисида иштирокчилар кўплиги сабабли суд мажлислари Москва шаҳар суди биносида бўлиб ўтмоқда”, деб ёзади “Интерфакс”.

Москва яқинидаги Красногорскдаги “Крокус Сити Ҳолл”даги теракт Россия тарихидаги энг қонли терактлардан бирига айланди. 2024 йилнинг 22 мартида қуролли шахслар “Пикник” рок-гуруҳи концерти бошланишидан олдин концерт залига бостириб кириб, ташриф буюрувчилар ва ходимларга қарата ўт очган, шундан сўнг бинода ёнғин бошланган.

Россия Федерацияси Бош прокуратураси маълумотларига кўра, 147 киши ҳалок бўлган, яна уч киши бедарак йўқолган, 550 киши яраланган. Етказилган зарар 5,7 миллиард рублни ташкил этди.

Ҳодиса учун жавобгарликни “Исломий давлат” террорчилик гуруҳининг Афғонистонда фаолият юритаётган бўлими – “Хуросон Вилояти” террорчилик гуруҳи ўз зиммасига олди. Бироқ ФХХ деярли дарҳол терактда “Украина изи” борлигини эълон қилди. Киев бу айбловларни қатъиян рад этади.

Тергов қўмитасининг фикрича, хорижда бўлган олти нафар фуқаро бевосита ташкилотчи бўлган. Орадан роппа-роса бир йил ўтиб, Россия Федерацияси Тергов қўмитаси терактда “нодўст давлатнинг махсус хизматлари”ни айблади ва бевосита ташкилотчилар сифатида олти нафар “Марказий Осиё фуқаролари”ни кўрсатди.

“Улар хорижда жойлашган, шунинг учун улар сиртдан ҳибсга олиниб, қидирувга берилган”, дея хабар берди терговчилар.

Уларнинг тахминига кўра, бу олти нафар террорчилик хуружининг тўрт нафар айбдорини Тожикистондан ёллаган ва уларни хорижда ўқитишни ташкил қилган. Тергов қўмитасининг фикрича, терактдан мақсад “Россиядаги вазиятни беқарорлаштириш” бўлган.

Бир йил ичида террорчиликда айбланган 19 киши билан тергов ҳаракатлари олиб борилди. Гумонланувчиларга пул, уй-жой, транспорт ва қурол билан ёрдам берганлар ҳам жавобгарликка тортилди.

“Крокус Сити Ҳолл”даги терактдан сўнг Россия ҳукумати муҳожирларга қарши кенг кўламли кампания бошлади, шундан сўнг Марказий Осиё давлатлари расмийлари ўз фуқароларига Россияга бормасликни тавсия қилди.