Россия Украинага оғир зарба бергани билан мақтанди

Россия Қуролли Кучлари тунда Украина ҳарбий саноатининг муҳим корхоналарига жамланган ҳужум уюштирди. Бу ҳақда Россия Мудофаа вазирлиги расмий вакили генерал-лейтенант Игорь Конашенков маълум қилди.

"Бугун тунда Россия Федерацияси Қуролли Кучлари Киев режими ҳарбий саноатининг муҳим корхоналарига узоқ масофали аниқ бошқариладиган ҳаво ва денгиз қуроллари билан концентрланган зарба берди", дейди Конашенков.

Унинг сўзларига кўра, ҳужумдан кўзланган мақсадга эришилган. 

“Барча белгиланган нишонларга зарба берилди. Украина ҳарбий-саноат мажмуасига катта зарар етди”, дея қўшимча қилган Конашенков.

Эслатиб ўтамиз, Россия 2 августга ўтар кечаси  Киевга, 8 августда Покровскка, 9 августда Запорожье шаҳрига ҳаво ҳужуми уюштирганди. 11 августда Россия Украинага “Кинжал” ракеталари билан, 12 августда эса Днепропетровск вилоятидаги Кривой Рог шаҳрига баллистик ракета билан ҳужум қилди. Россия ҳужумларининг аксариятида турар-жойлар зарар кўрган ва тинч аҳоли ҳалок бўлганди.