Мирзиёев ЕИнинг Марказий Осиё бўйича вакили билан учрашди

Бугун, 13 май куни Ўзбекистон Президенти Шавкат Мирзиёев Европа Иттифоқининг Марказий Осиё бўйича махсус вакили Эдуардс Стипрайсни қабул қилди. Бу ҳақда Президент матбуот хизмати хабар берди. 

ЕИнинг махсус вакили Еврокенгаш Президенти Антониу Кошта ва Еврокомиссия Президенти Урсула фон дер Ляйеннинг саломи ва энг эзгу тилакларини етказган.

Шунингдек, жорий йилнинг апрель ойида Самарқанд шаҳрида ўтган “Марказий Осиё - Европа Иттифоқи” биринчи саммитида қабул қилинган қарорларни амалга ошириш доирасида икки томонлама ва минтақавий ҳамкорликни кенгайтириш масалалари муҳокама қилинган.

Инвестициявий ва молиявий-техник ҳамкорлик бўйича умумий қиймати 12 миллиард евролик аниқ лойиҳаларни тез фурсатда тайёрлаш ва илгари суришга алоҳида эътибор қаратилган.

Минтақавий кун тартибидаги долзарб масалалар юзасидан фикр алмашилган, шунингдек, бўлажак тадбирлар режаси кўриб чиқилган.

Эслатиб ўтамиз, жорий йилнинг 2 апрель куни Антониу Кошта ва Урсула фон дер Ляйен “Марказий Осиё - Европа Иттифоқи” форматидаги биринчи олий даражадаги саммитда қатнашиш учун Самарқандга келганди. 3 апрель куни Шавкат Мирзиёев Антониу Кошта ва Урсула фон дер Ляйен билан учрашув ўтказди. Уларнинг ҳузурида Тошкентда Европа инвестиция банкининг минтақавий офисини таъсис этиш тўғрисида битим имзоланганди.

4 апрель куни эса улар “Марказий Осиё – Европа Иттифоқи” биринчи саммити ва Самарқанд халқаро иқлим форумида иштирок этганди.