Mirziyoyev Rossiya Transafg‘on temiryo‘li loyihasiga qiziqayotganini aytdi

Joriy yilning 19 fevral kuni Rossiya Federatsiyasi hukumati raisining o‘rinbosari — Sanoat va savdo vaziri, Iqtisodiy hamkorlik bo‘yicha hukumatlararo qo‘shma komissiya hamraisi Denis Manturov boshchiligidagi delegatsiya Toshkentda O‘zbekiston Prezidenti Shavkat Mirziyoyev qabulida bo‘lganida, ko‘plab masalalar qatorida Transafg‘on temiryo‘lini qurish loyihasidagi Rossiyaning ishtiroki muhokama qilingan. Rossiya delegatsiyasi bunga qiziqish bildirgan. Bu haqda Prezident Shavkat Mirziyoyev kecha, 21 fevral kuni Rossiya yetakchisi Vladimir Putin bilan uchrashuvida ma’lum qildi.

“Transport bilan bog‘liq jiddiy masala Afg‘oniston orqali yangi temiryo‘l qurilishidir. (Rossiya Transport vaziri Vitaliy) Savelyov o‘sha yerda edi. Biz kelishib oldik. Rossiyalik hamkasblarimizning ushbu masala bo‘yicha loyihani texnik jihatdan asoslashda, keyin esa yanada targ‘ib qilishda ishtirok etishidan manfaatdormiz”, deydi Mirziyoyev.

Prezident Rossiya va O‘zbekiston iqtisodiy sohada boshqa ikki tomonlama loyihalarni ham amalga oshirayotganini qo‘shimcha qilgan. 

"Bizda real loyihalar, real ijrochilar, real hududlar, katta loyihalar bor. Siz tomondan katta jamoa borgandi, men ularning barchasi bilan batafsil gaplashdim, haqiqiy natija bor", deydi u.

Ma’lumot uchun, O‘zbekiston, Afg‘oniston va Pokiston 2021 yil fevral oyida Termiz – Mozori Sharif – Qobul – Peshovar temiryo‘li qurilishi bo‘yicha yo‘l xaritasini imzolagan. Loyihaning dastlabki qiymati qariyb 5 milliard dollar bo‘lib, Yevropa davlatlari, Rossiya, O‘zbekiston, Afg‘oniston, Pokiston, Hindiston va Janubi-Sharqiy Osiyo davlatlarini bog‘laydigan yangi transport yo‘lagining yuk o‘tkazish salohiyati 20 million tonnaga baholanmoqda. Dizayn ishlari hali ham davom etmoqda.

Eslatib o‘tamiz, 19 fevral kuni Afg‘onistondagi “Tolibon” muvaqqat hukumatining milliy temiryo‘l boshqarmasi boshlig‘i mulla Baxt ul Rahmon Sharofat boshchiligidagi delegatsiyasi Transafg‘on loyihasi yig‘ilishida ishtirok etish va ikki tomonlama hamkorlikni kengaytirish maqsadida Toshkentga kelgandi.