Мирзиёев Путин билан телефон орқали мулоқот қилди

Бугун, 9 август куни Ўзбекистон Президенти Шавкат Мирзиёев Россия раҳбари Владимир Путин билан телефон орқали мулоқот қилди. Бу ҳақда Ўзбекистон Президентининг матбуот хизмати хабар берди. 

Маълум қилинишича, давлат раҳбарлари ўзаро суҳбатда икки мамлакат ўртасидаги стратегик шериклик ва иттифоқчилик муносабатларини янада ривожлантириш масалаларини муҳокама қилган. 

Савдо-иқтисодий ҳамкорликни янада кенгайтириш ва фаол гуманитар алмашинувни давом эттиришга алоҳида эътибор қаратилган. 

Икки давлат етакчилари бўлажак тадбирлар режасини ҳам кўриб чиқиб, яқин муддатларда қўшма Ҳукуматлараро комиссиянинг навбатдаги йиғилишини, Ўзбекистон-Россия ҳудудлар, таълим ва медиа форумларини ўтказиш муҳимлигини таъкидлаган. 

Шунингдек, суҳбат жараёнида минтақавий ҳамкорлик масалалари юзасидан фикр алмашилган.

Эслатиб ўтамиз, бундан аввал Путин жорий йилнинг 24 июль куни Шавкат Мирзиёевга қўнғироқ қилиб, уни таваллуд куни билан табриклаган эди.