Мирзиёев Бишкекда бўғирсоқ билан кутиб олинди

Ўзбекистон Республикаси Президенти Шавкат Мирзиёев амалий ташриф билан Бишкек шаҳрига етиб борди. Бу ҳақда давлат раҳбарининг матбуот хизмати хабар берди.

“Манас” халқаро аэропортида Шавкат Мирзиёевни Қирғизистон Вазирлар Маҳкамаси Раиси – Президент Администрацияси раҳбари Оқилбек Жапаров ва бошқа расмий шахслар кутиб олган. Шунингдек, Оқилбек Жапаров бошқа меҳмон раҳбарлар каби Шавкат Мирзиёевга ҳам қирғиз бўғирсоғини татиб кўришни таклиф қилди.

“Бугун, 13 октябрь куни Қирғизистон пойтахтида Мустақил Давлатлар Ҳамдўстлиги саммити бўлиб ўтади. Давлат раҳбарлари кенгашининг навбатдаги мажлиси кун тартибидан МДҲ доирасидаги кўп томонлама ҳамкорликни янада кенгайтириш, жумладан, савдо, инвестициялар, саноат кооперацияси, инновациялар, рақамлаштириш, транспорт, таълим, маданият ва бошқа соҳаларда қўшма дастур ва лойиҳаларни амалга ошириш масалалари ўрин олган”, дейилади Президент матбуот хизмати хабарида.

Эслатиб ўтамиз, Россия Президенти Владимир Путин расмий ташриф билан Қирғизистонга келганди. У бугун бўлиб ўтадиган МДҲ саммитида иштирок этиб, у ерда мавқедошлари, жумладан, Ўзбекистон Президенти Шавкат Мирзиёев билан учрашишини маълум қилган эди.