Миллий гвардия қўмондони Қўл жанги федерациясига раис бўлди

Бугун, 6 февраль Ўзбекистон Қўл жанги федерациясининг навбатдан ташқари Конференцияси бўлиб ўтди. Унда Миллий гвардия қўмондони генерал-полковник Баходир Тошматов федерация раислик лавозимига сайланди. Бу ҳақда Миллий Гвардия матбуот хизмати хабар берди.

Овоз бериш якунларига кўра, делегатлар томонидан Миллий гвардия қўмондони генерал-полковник Баходир Ташматов бир овоздан Ўзбекистон ҳуқуқни муҳофаза қилиш органларининг Қўл жанги федерацияси раиси этиб сайланган. 

Шунингдек, тадбирда федерация фаолиятини такомиллаштириш, қўл жанги спорт турини янада ривожлантириш масалалари ҳам кўриб чиқилган. 

Янги сайланган федерация раиси ўз нутқида сўнгги йилларда спорт соҳасига қаратилган давлат эътибори натижасида спортчилар халқаро мусобақаларда юқори натижаларга эришаётганини қайд этган. Шунингдек, 2022 йил 20 июнда қабул қилинган “Қўл жанги спорт турини янада ривожлантириш чора-тадбирлари тўғрисида”ги қарор қўл жанги спорт турини ривожлантиришда муҳим аҳамият касб этиши таъкидланган. 

Конференция давомида қўл жанги спорт турини янада ривожлантириш бўйича қатор амалий вазифалар белгиланган. Жумладан, секция ва тўгараклар мавжуд бўлмаган туманларда камида иккитадан қўл жанги секциясини ташкил этиш, ёшларни спортга кенг жалб қилиш, истиқболли спортчиларни саралаб олиш ҳамда уларни касбга йўналтириш вазифалари белгилаб олинган.

Шу билан бирга, иқтидорли қўл жангчи спортчиларни Қуролли кучлар ва ҳуқуқни муҳофаза қилиш органлари сафларига жалб этиш, шунингдек, мусобақаларни мунтазам ташкил этиш ва ғолиб спортчиларни муносиб рағбатлантириш бўйича вазифалар ҳам белгиланган.

Эслатиб ўтамиз, аввалроқ Давлат хавфсизлик хизмати раиси Баҳодир Қурбонов Ўзбекистон футбол ассоциацияси президенти лавозимига қайта сайланганди.