Миллиардерлар чўкиб кетган яхта сув тагидан олиб чиқилади

Бугун, 30 апрель куни италиялик қутқарувчилар Bayesian суперяхтасини кўтариш бўйича операция ўтказади. Бу ҳақда “The Guardian” хабар берди.

Маълум қилинишича, ушбу қутқарув ишларининг нархи 30 миллион долларга баҳоланмоқда.

Яхта британиялик миллиардер Майкл Линчга тегишли бўлиб, 2024 йил 19 августда ҳалокатга учраган. Ўша пайтда бортда 22 киши бўлган. Ҳалок бўлган етти киши орасида Майкл Линчнинг ўзи, унинг 18 ёшли қизи Ханна ва Morgan Stanley International раиси Жонатан Блумер ҳам бўлган.

Яхта қолдиқлари Италия ҳукумати назорати остида бўлган Porticello кўрфазида 50 метр чуқурликда жойлашган. Мутахассислар яхтани кўтариб олиш операцияси жуда қийин бўлишини кутмоқда.

Ўтган йилнинг август ойида Сицилия прокуратураси кема ҳалокати бўйича жиноий иш қўзғатган эди.

Қайд этилишича, яхта қирғоққа олиб чиқилганидан кейин суд-тиббиёт экспертизаси люклардан бири очиқ бўлган ёки бўлмаганини аниқлаши мумкин.

Эслатиб ўтамиз, аввалроқ Конго Демократик Республикасининг шимоли-ғарбида жойлашган ҳудудда бортида қарийб 500 киши бўлган кемада ёнғин чиқиши оқибатида камида 148 киши ҳалок бўлган, яна 100 дан ортиқ одам бедарак йўқолган эди.