Мессидан Ҳусановгача ёхуд футбол тарихидаги омадсиз дебютлар

Ҳар бир соҳада бўлгани каби футболда ҳам биринчи иш кунини муваффақиятли ўтказиш муҳим. Аммо қўпол хатолар, ўйиннинг босими каби сабаблар туфайли футболчиларнинг дастлабки ўйини кўнгилдагидек ўтмайди. 

Бугун мана шундай дебют ўйинларни омадсиз ўтказган футболчилар ҳақида сўз юритамиз. Улар орасида дунёнинг таниқли футболчиларининг номини учратиш мумкин.

Мойзес Кайседо

“Челси” “Ливерпуль” билан курашда ғолиб чиқиб, Мойзес Кайседони 115 миллион фунт-стерлингга сотиб олди. Бу трансфер АПЛ тарихидаги энг қиммат трансферга айланди. Эквадорлик футболчи “аристократлар” сафидаги илк ўйинда “Вест Хэм”га қарши майдонга тушди. Учрашув давомида у кўплаб хатоларга йўл қўйди ва жамоасининг мағлубиятига асос бўлган пенальтига сабабчи бўлди. Аммо у мавсум давомида ўз даражасини қайта тиклади ва 2024/25 йилги мавсумда Премьер лиганинг энг яхши ярим ҳимоячиларидан бирига айланди.

Тьяго Сильва

Тьяго Сильва “Челси”нинг замонавий футболдаги энг яхши ўйинчиларидан бири. Аммо унинг инглиз футболидаги илк ўйини муваффақиятсиз ўтди. “Вест Бромвич”га қарши дебют ўйиннинг биринчи таймида унинг жамоаси иккита гол ўтказиб юборди. Футболчи ҳимоя чизиғидаги энг ёмон ўйинчи сифатида баҳоланган. Аммо иккинчи бўлимда Маунт, Хадсон-Одои ва Темми Абрахамнинг голлари эвазига “Челси” ғалаба қозонди ва Сильванинг омадсиз ўйини унутилди.

Лионель Месси

Айтиш мумкинки, ҳаттоки барча даврларнинг энг яхши футболчиларидан бири Лионель Мессининг ҳам Аргентина терма жамоасидаги дебют ўйини ўта муваффақиятсиз ўтган. Вингер Венгрияга қарши ўртоқлик ўйинидаги дебютда 63-дақиқада захирадан майдонга тушди. Бироқ Месси венгриялик футболчи Вилмоц Ванчакка қарши қўполлик ишлатиб, қизил карточкага лойиқ кўрилган. Кийим алмаштириш хонасига кўзида ёш билан чиқиб кетган. Аммо унинг кейинги фаолияти қандай ўтганини ҳар бир футбол мухлиси-ю мутахассиси жуда яхши билади.

Абдуқодир Ҳусанов

“Ланс”даги 1 мавсумнинг ўзидаёқ шов-шувларга сабаб бўлиб, қишки трансферлар ойнасида бир қанча гранд клублар нишонида бўлган ўзбекистонлик футболчи Абдуқодир Ҳусанов якунда “Манчестер Сити” футболчисига айланди. Марказий ҳимоячи 26 январга ўтар кечаси АПЛ доирасида “Челси”га қарши баҳсда асосий таркибдан ўрин олди. Аммо ўйиннинг 2-дақиқасидаёқ Ҳусанов тўпни Эдерсонга етказиб беришда хатога йўл қўйди. Ушбу хатонинг якуни голга сабаб бўлди. Орадан 2 дақиқа ўтиб, Палмерга нисбатан қоида бузиб, сариқ карточка билан жазоланди. Иккинчи таймнинг 52-дақиқасида у Стоунз билан алмаштирилди.

Аммо футболчининг мослашиши учун вақт бор ва у бу ҳолатдан тезда чиқиб кета олади. Мураббий Гвардиола ҳам у ҳақида илиқ фикрларини билдирди.

“Мен Абдуқодирни хатолари учун алмаштирмадим. У кучли ўйинчи, мен унга ишонаман. Шунчаки унинг сариқ карточкаси борлиги учун уни Стоунзга алмаштирдим”, дейди Гвардиола.