Месси Жаҳон чемпионатидан кейин “Интер Майами” машғулотларига қайтди

Шимолий Америка Олий футбол лигаси (MLS)нинг “Интер Майами” клуби ҳужумчиси Лионель Месси Жаҳон чемпионатидан сўнг жамоа машғулотларига қўшилди. Бу ҳақда клубнинг ижтимоий тармоқлардаги саҳифасида маълум қилинди.

“Бугун футболчиларнинг келиши бутунлай бошқача кайфиятда қарши олинмоқда”, дейилади Мессининг машғулот майдонига келаётган суратига илова қилинган изоҳда.

Шунингдек, клуб аргентиналик юлдузнинг машғулотларга киришгани акс этган видеони ҳам эълон қилди.

Лионель Месси сўнгги марта жорий йилнинг 19 июль куни АҚШ, Канада ва Мексикада ўтказилган Жаҳон чемпионати финалида Испанияга қарши баҳсда (0:1) майдонга тушган эди.

Маълумот учун, 39 ёшли Месси ўтган мавсум “Интер Майами” сафида MLS чемпионлигини қўлга киритган. Аргентиналик ҳужумчи 2023 йилдан буён АҚШ клубида тўп суриб келмоқда.

Шу вақтга қадар Месси “Интер Майами” сафида 104 та учрашувда майдонга тушиб, 90 та гол муаллифи бўлган.