Месси ва Роналду бирга ўйнашга рози бўлди 

Жаҳон футболи юлдузлари Лионель Месси ва Криштиану Роналду келажакда бир жамоа сафида майдонга тушадиган бўлди. Бу ҳақда Карлос Тевес “Footmercato” нашрига берган интервьюсида сўз очди.

Аргентиналик собиқ ҳужумчи хайрлашув учрашувини ўз ватанида, “Бомбонера” стадионида ўтказишни режалаштирмоқда. Унда Тевес ўзи билан бирга ўйнаган собиқ жамоадошлари ва дўстларидан иборат рамзий ўйин ташкил қилмоқчи. Улар орасида Месси ва  Роналду ҳам бор. Тевеснинг сўзларига кўра, Роналду иштирок этишга розилик берган, Мессини ҳам кўндириш қийин бўлмаган.

“Роналду у ерда бўлишини айтди. Леони ҳам ишонтириш қийин бўлмади. Иккаласи ҳам розилик берди. Мен буни интиқлик билан кутяпман. Бу жуда таъсирли ўйин бўлади”,  дейди Тевес.

Тевес аввал ҳам Месси ва Роналдуни бир жамоада кўришни орзу қилишини айтган эди. Энди у бу ғояни ўзининг хайрлашув учрашувида амалга оширишга ҳаракат қилмоқда.

Учрашув 2026 йил декабрь ойида “Бомбонера”да ўтказилиши режалаштирилган. Аниқ сана ҳозирча расман эълон қилинмаган.

Маълумот учун, Тевес 2022 йилда профессионал футболдаги фаолиятини якунлаган. У Месси билан Аргентина терма жамоасида, Роналду билан эса “Манчестер Юнайтед”да бирга ўйнаган.