Месси ортидан яна тўрт футболчи Аргентина терма жамоасини тарк этиши мумкин

Аргентинанинг “олтин авлоди” Мессининг кетишидан сўнг миллий терма жамоа билан оммавий равишда хайрлашиши мумкин. Бу ҳақда “Footynewsonly” нашрининг хабар берди.

Аргентина терма жамоаси сафидаги бир қатор тажрибали футболчилар жамоа сардори Лионель Мессининг халқаро футболдан кетиши ортидан терма жамоа билан хайрлашмоқчи.

Хусусан, Леандро Паредес терма жамоада ўйнашни давом эттириш тобора қийинлашиб бораётганини тан олган. Шунингдек, Родриго де Поль, Эмилиано Мартинес ва Николас Тальяфико ҳам миллий жамоадаги келажаги борасида шубҳалар билдирган.

Николас Отаменди эса аллақачон халқаро фаолиятини якунлашини эълон қилган. Шу тариқа, Аргентина футболида бутун бир давр якунланиши мумкин. 2021 йилги Америка кубоги, 2022 йилги Жаҳон чемпионати ва 2024 йилги Америка кубогида ғолиб чиққан авлод аста-секин миллий терма жамоа билан хайрлаша бошламоқда.

Эслатиб ўтамиз, аввалроқ Лионель Месси миллий терма жамоадаги фаолиятини якунлашини расман эълон қилганди. Мессининг терма жамоа либосидаги сўнги учрашуви 2026 йилги Жаҳон чемпионати финали бўлди. Ўша финалда Аргентина қўшимча вақтда Испанияга 0:1 ҳисобида мағлуб бўлган эди.

39 ёшли сардор Аргентина терма жамоасидаги 21 йиллик фаолияти давомида 207 та ўйин ўтказиб, 125 та гол урди. Месси 2022 йилда Қатарда бўлиб ўтган Жаҳон чемпионатидаги ғолиб чиққан. Шунингдек, Месси икки марта Америка кубогини қўлга киритди (2021, 2024), 2022 йилда Финалиссима ғолиби бўлди ва 2008 йилги Олимпиада ўйинларида олтин медалга сазовор бўлган.