Месси фаолиятидаги 100-клубга гол урди

Бугун, 26 июль куни Шимолий Америка Лига кубоги турнири доирасида “Интер Майами” клуби ўз майдонида “Атланта Юнайтед”ни 4:0 ҳисобида мағлубиятга учратди. Мазкур баҳсда Флорида жамоаси шарафини ҳимоя қилаётган аргентиналик 36 ёшли Лионель Месси рақиб дарвозасига иккита гол урди. Бу орқали у фаолияти давомида 100 та турли клубларга гол урган футболчига айланди. 

Қайд этиб ўтиш жоиз, аргентиналик футболчи “Интер Майами” сафидаги 2 та ўйинида 3 та гол ва битта голли узатмага муаллифлик қилди. 

Маълумот учун, Месси сўнгги икки йил давомида Франциянинг ПСЖ клуби шарафини ҳимоя қилди. У 2022/2023 йилги мавсумда жамоа учун барча турнирларда 40 та ўйин ўтказиб, ўз активларига 21 та гол ва 20 та голли узатмани расмийлаштириб қўйди.

Эслатиб ўтамиз, аввалроқ Аргентиналик футболчи Лионель Мессининг “Интер Майами”даги дебют ўйинини Америка телевидениесида рекорд ўрнатган эди. Мазкур баҳс зангори экран қаршисига 12,5 миллион томошабинни жалб қила олган.