Мен уруш қилишдан зерикмайман – Трамп

АҚШ Президенти Дональд Трамп Эронга қарши операциянинг учинчи кунида Ислом республикасига нисбатан янги зарбаларнинг мақсад ва истиқболларини баён қилди. Бу ҳақда “Associated Press” хабар берди.

У жанг ҳаракатлари беш ҳафтадан ортиқ давом этиши мумкинлигини истисно қилмаган ва бу можаро яқин вақт ичида “жонига тегиши” ҳақидаги тахминларни рад этган. 

Трамп ўз нутқида “Эпик ғазаб” операцияси доирасида АҚШ ҳарбийлари Эрон ҳудудида кенг кўламли жанг ҳаракатларини давом эттираётганини айтган. Унинг таъкидлашича, асосий мақсад – Америка учун “ўлимли таҳдид” деб баҳоланаётган Эрон режими хавфини бартараф этиш.

У “Ярим тун болғаси” операцияси чоғида Эроннинг ядровий дастури йўқ қилинганини билдириб, Теҳрон огоҳлантирилганига қарамай, ядровий қуролга эга бўлиш уринишларидан воз кечмаганини таъкидлаган. Шунингдек, у Эроннинг баллистик ракета дастури тез суръатларда ривожланаётгани ва бу АҚШ ҳамда хорижда жойлашган америкалик кучлар учун катта таҳдид эканини қайд этган.

Трампга кўра, Эрон узоқ масофали ракеталар ва ядровий қуролга эга бўлса, бу нафақат Яқин Шарқ, балки бутун Америка халқи учун қабул қилиб бўлмайдиган хавф туғдиради. У, шунингдек, собиқ президент Барак Обама даврида имзоланган Эрон ядровий келишувини танқид қилиб, уни бекор қилганидан фахрланишини билдирган.
Нутқида у Эрон режими қарийб 47 йил давомида АҚШга қарши ҳаракат қилиб келганини айтиб, Ислом инқилоби қўриқчилари корпусининг “Ал-Қудс” махсус бўлинмаси қўмондони бўлган Қосим Сулаймонийни биринчи президентлик муддатида йўқ қилганини эслатган.

Трамп ҳозирги ҳаракатларни “охирги ва энг яхши имконият” деб атаб, тўртта асосий мақсадни санаб ўтган: Эроннинг ракета салоҳиятини йўқ қилиш, унинг янги ракета ишлаб чиқариш қобилиятини бартараф этиш, ҳарбий-денгиз флотини йўқ қилиш ҳамда Эроннинг ядровий қуролга эга бўлишининг олдини олиш. Шунингдек, у Теҳроннинг хориждаги “террористик армиялар”ни қуроллантириш, молиялаштириш ва бошқариш имкониятига чек қўйиш режалаштирилаётганини билдирган.

Президентнинг сўзларига кўра, АҚШ армияси жаҳондаги энг кучли армия ҳисобланади ва амалиёт белгиланган муддатдан анча илгарилаб кетган. Дастлаб тўрт-беш ҳафта деб баҳоланган вазифаларнинг айримлари қисқа вақт ичида бажарилгани айтилган.

Шу билан бирга, у жанг ҳаракатлари қанча вақт талаб этса, шунча давом этишини ва бу можаро унга “жонига тегмаслиги”ни таъкидлаган.

“Бизга зерикарли бўлмайди. Менга ҳеч қачон зерикарли эмас”, деган Трамп.

Нутқ якунида у хизмат вазифасини бажариш чоғида ҳалок бўлган тўрт нафар америкалик ҳарбийни ёдга олиб, қуролли кучларга миннатдорлик билдирган.

Эслатиб ўтамиз, аввалроқ АҚШ разведкаси Эрон олий раҳбари Оятуллоҳ Али Хоманаий ҳалок бўлганидан сўнг Теҳрон томонидан Америкага қарши эҳтимолий ҳужумлар содир этилиши мумкинлиги ҳақида огоҳлантирганди.