Мексикада қарийб 30 киши сув тошқини қурбони бўлди

Охирги бир неча кун ичида Мексиканинг марказий ва жанубий ҳудудларида юз берган сув тошқинлари ва кўчкилар оқибатида 28 киши ҳалок бўлган ёки бедарак йўқолган. Бу ҳақда “Associated Press” хабар берди.

“Идальго штатининг Тенанго-де-Дориа ҳудудида саккиз киши, Сакуалтипанда яна саккиз киши ҳалок бўлган. Бу ҳозирча бизда мавжуд маълумотлар,” дейди штат губернатори Хулио Менчака Саласар матбуот анжуманида.

Пуэбла штати ҳукумати маълумотига кўра, табиий офат камида беш кишининг ҳаётига зомин бўлган. Ҳуачинанго муниципалитетида кўчки оқибатида саккиз киши бедарак йўқолган, шунинг учун қурбонлар сони ортиши мумкин.

Веракрус штати губернатори Росио Нале эса Касонес дарёсининг қирғоқлардан тошиб кетиши оқибатида Поса-Рика шаҳрининг катта қисми сув остида қолганини, икки киши ҳалок бўлгани ва бир неча киши бедарак йўқолгани ҳақида маълум қилган.

Фуқаролик мудофааси миллий хизмати координатори Лаура Веласкеснинг айтишича, кучли ёмғирлар Мексиканинг 32 штатидан 31 тасида қайд этилган. Энг катта зарар Веракрус, Пуэбла, Сан-Луис-Потоси, Керетаро, Идальго ва Герреро штатларида кузатилган. Фақат Веракруснинг ўзида 38 муниципалитет ва 5 мингга яқин уй зарар кўрган, олти вақтинчалик бошпанада 500 дан ортиқ одам жойлаштирилган.

Мексика Президенти Клаудия Шейнбаумнинг сўзларига кўра, ҳарбий кучлар ва фуқаролик мудофааси ходимлари табиий офат оқибатларини бартараф этишда иштирок этмоқда, федерал ҳукумат эса штат губернаторлари билан бевосита алоқа ўрнатган.

Об-ҳаво мутахассисларининг огоҳлантиришича, циклонлар таъсирида юзага келаётган кучли ёмғирлар Мексикада яқин кунларда ҳам давом этади.

Эслатиб ўтамиз, аввалроқ кучли тўфон ортидан Тайваннинг Хуалянь туманида тўғон ёрилиши оқибатида камида 14 киши ҳалок бўлгани ҳақида хабар берилган эди.