Мексика 40 йилдан сўнг биринчи марта плей-оффда ғалаба қозонди

Бугун, 2026 йилги Жаҳон чемпионати 1/16 финал босқичида Мексика миллий терма жамоаси Эквадорни 2:0 ҳисобида мағлуб этиб, 1/8 финалга йўл олди.

Учрашув дастлаб Тошкент вақти билан соат 06:00 да бошланиши режалаштирилган эди. Бироқ момақалдироқ сабабли баҳс бир соат кеч бошланди. Ўйинда голларга Хулиан Киньонес 22-дақиқада ва Рауль Хименес 31-дақиқада муаллифлик қилди. Қўшимча вақтнинг бешинчи дақиқасида Эквадор ҳимоячиси Пьеро Инкапие қизил карточка олиб, майдонни тарк этди.

Ўйинда киритилган голларни ушбу ҳавола орқали томоша қилишингиз мумкин.

Шу тариқа, Мексика терма жамоаси 1986 йилдан бери илк бор Жаҳон чемпионатида плей-оффнинг биринчи босқичидан ўтишга муваффақ бўлди. Ўша мундиалда Мексика мезбонлик қилган ва чорак финалгача етиб борган эди.

Эндиликда Мексика 1/8 финалда Англия ва Конго Демократик Республикаси учрашуви ғолиби билан куч синашади. 

Ушбу баҳс 6 июль куни Мехико шаҳрида бўлиб ўтади.

Эслатиб ўтамиз, 2026 йилги Жаҳон чемпионати АҚШ, Мексика ва Канада мезбонлигида ўтказилмоқда. Тарихда илк бор 48 та терма жамоа иштирок этаётган турнир жорий йилнинг 19 июль куни якунланади.