Мбаппе танқидларга жавоб берди

“Реал” ҳужумчиси Килиан Мбаппе ўзига қаратилган танқидларга жавоб қайтарди. Француз футболчисининг сўзларига кўра, у танқидларни хотиржам қабул қилади ва Мадрид клубида ўзини жуда яхши ҳис қилмоқда. Бу ҳақда футбол журналисти Фабрицио Романо Х саҳифасида маълум қилди. 

“Ҳозир ўзимни жуда яхши ҳис қиляпман. Мен “Реал Мадрид”даги энг яхши вақтимни ўтказяпман. Жуда хотиржамман ва танқид одатий ҳолдир. Одамлар салбий сўзларни айтганда, хотиржам бўлиш ва олдинга интилиш керак”, дейди Мбаппе.

Мбаппе жорий мавсумда барча турнирларда 29 та ўйин ўтказиб, 17 та гол урди ва 3 та голга ассистентлик қилди. Футболчининг клуб билан амалдаги шартномаси 2029 йилнинг ёзига қадар тузилган. “Transfermarkt” порталида берилган маълумотларга кўра, футболчининг бозор қиймати 160 миллион еврони ташкил қилади.

Эслатиб ўтамиз, аввалроқ Анчелотти Мбаппени дунёнинг энг яхши марказий ҳужумчиси сифатида тан олиши хабар қилинганди.