Маст онаси томонидан калтакланган қизчанинг аҳволи маълум қилинди

Аввалроқ Тошкент шаҳрининг Мирзо Улуғбек туманида маст аёл ўз қизини аёвсиз калтаклагани ҳақида хабар берилган эди. Болалар омбудсмани қизча ҳозир қаерда экани ва унинг айни дамдаги ҳолати ҳақида маълумот берди. 

Қайд этилишича, бугун, 23 ноябрь куни Болалар омбудсмани қизчанинг ҳолидан хабар олиш учун Тошкент шаҳар вояга етмаганларга ижтимоий-ҳуқуқий ҳимоя кўрсатиш марказига борган. Унга кўра, қизалоқ ўзини яхши ҳис қилмоқда ва марказда у учун барча қулай шароитлар яратилган. 

“Кечагина онасининг зўравонлигидан азият чеккан қизчамизни марказда бошқа болалар даврасида кўриб, ҳозирда унинг эмоционал ҳолати, кайфияти яхши эканлигига ишонч ҳосил қилдик. Ниҳоятда очиқкўнгил, хушчақчақ болажон. Бундан буён қизчанинг болалиги хавфсиз ва соғлом муҳитда кечиши учун зарур бўлган барча саъй-ҳаракатлар қилинади”, дейди Болалар омбудсмани.

Эслатиб ўтамиз, ҳозирда ушбу қизчани маст ҳолида ҳақоратлаб, калтаклаган онаси В.А.ни оналик ҳуқуқидан маҳрум қилиш масаласи кўриб чиқилмоқда.