Маск “энг ақлли сунъий интеллект”ни ишга туширади

Эртага, 18 февраль куни эрталаб Илон Маскнинг xAI стартапи Grok 3 чат-ботини тақдим этади. У “Ер юзидаги энг ақлли сунъий интеллект” бўлади. Бу ҳақда Маск ўзининг X'даги саҳифасида маълум қилди.

Қайд этилишича, сунъий интеллект соҳасидаги ушбу чат-ботнинг намойиши Тошкент вақти билан эртага, 18 февраль куни соат 09:00 да (Тинч океани вақти билан 17 февраль 20:00) бўлиб ўтади. 

Илон Маскнинг таъкидлашича, Grok 3 чат-боти “даҳшатли зукколик” намойиш этиб, ҳатто унинг ўзи учун ҳам олдиндан айтиш қийин бўлган ечимларни таклиф қилмоқда. Ушбу модель сунъий маълумотлар асосида ўқитилган бўлиб, хатоларни таҳлил қилиш, уларни олдиндан кўриш ва олдини олиш қобилиятига эга.

“Ердаги энг ақлли сунъий интеллект”, деб ёзди Маск.

Янги сунъий интеллект модели бепул фойдаланиш учун тақдим этилиши кутилмоқда. Илгари Grok фақат Premium ва Premium + пуллик обуначилари учун мавжуд бўлган. Эндиликда Маскнинг нейрон тармоғидан веб версияда – Grok.com сайтида ҳамда барча фойдаланувчилар учун мобил илова орқали фойдаланиш мумкин. Кўплаб бошқа сунъий интеллект ечимларидан фарқли ўлароқ, ушбу AI модели чекловларга, жумладан, ахлоқий чекловларга нисбатан камроқ боғланган. 

north_east

Рақобатчиси пайдо бўлган ChatGPT ҳамма учун текин қилинди

2024 йил декабрь ойи охирида Илон Маск ўзининг X  ижтимоий тармоғи барча фойдаланувчилар учун махсус чат-бот Grok 2 га бепул кириш имкониятини тақдим этган эди.

Маълумот учун, xAI 2024 йил декабрь ойида инвесторлар, жумладан, америкалик венчур капитал фондлари, Nvidia ва AMD чип ишлаб чиқарувчилари ҳамда Саудия Арабистони ва Қатардаги инвестиция фондларидан 6 миллиард доллар жалб қилганини хабар қилган. xAI бозорнинг етакчи ўйинчиси бўлишга ҳаракат қилмоқда. У OpenAI томонидан ишлаб чиқилган ChatGPT каби маҳсулотлар билан тўлдирилган бозор шароитида рақобат афзаллигини қўлга киритишга интилмоқда.

Эслатиб ўтамиз, ўтган ой Хитойнинг DeepSeek стартапи сунъий интеллект саноатини ҳайратга солиб, арзон ва юқори сифатли чат-ботни ишга туширганди. Бу АҚШнинг ушбу технология бўйича глобал етакчиликка бўлган амбицияларига жиддий чақириқ бўлди. DeepSeek тез орада Apple иловалар дўконида юклаб олишлар сони бўйича ChatGPT’ни ортда қолдирди.