Машҳур мушкетёр д’Артаньяннинг қолдиқлари топилди

Нидерландиянинг Маастрихт шаҳридаги Муқаддас Пётр ва Павел черковида машҳур француз мушкетёри д’Артаньянга тегишли бўлиши мумкин бўлган скелет топилди. Бу ҳақда черков вакиллари ва археологларга таяниб, “L1nieuws.nl” хабар берди. 

Қайд этилишича, скелет февраль ойида черков пол қисмининг бир бўлаги чўкиб кетганидан сўнг, тўғридан тўғри меҳроб олдидан топилган. Реставрация ишлари давомида пол очилганда, инсон қолдиқларига дуч келинган.

Маълумки, Александр Дюманинг “Уч мушкетёр” романи қаҳрамонининг прототипи бўлган д’Артаньян 1673 йил 25 июнда Людовик XIV нинг француз армияси Маастрихтни қамал қилиш пайтида ҳалок бўлган. Ривоятларга кўра, у мушкет ўқидан ҳалокатли жароҳат олган. Жазирама иссиқ ва жангнинг чўзилиб кетгани сабабли жасадни Парижга олиб кетмасликка қарор қилинган. Шу боис, шарафли аскарни Маастрихтнинг ўзида дафн этишган. Ўша пайтда француз армияси Маастрихт яқинидаги Вольдер қишлоғида қароргоҳ қурган эди. Эҳтимол, айнан шу черков д’Артаньяннинг сўнгги қўним топган макони бўлган.

Черков вакилларининг айтишича, скелет ёнида француз тангаси ётибди. Қабрнинг жойлашуви (илгари меҳроб турган жойда экани) ҳам бу ерга жуда муҳим шахс дафн этилганидан далолат беради.

Бу ҳақиқатан ҳам д’Артаньян эканини аниқлаш учун 13 март куни олимлар жағ суягидан ДНК намунасини олган. Ҳозирда Мюнхендаги лаборатория ушбу ДНКни тарихий шахснинг авлодлари ДНКси билан солиштирмоқда. Натижалар яқин кунларда кутилмоқда. Тадқиқотда иштирок этган археолог Вим Дейкман ижобий натижага бўлган умид жуда юқори эканини таъкидлаган.

“Мен 28 йилдан бери д’Артаньян қабрини тадқиқ қилиш билан шуғулланаман. Бу менинг фаолиятимнинг чўққиси бўлиши мумкин. Францияда кўплаб танишларим бор ва улар доим мендан нега д’Артаньян ҳалигача топилмаганини сўрашади. Афтидан, вазият ҳозир айнан шунга яқин, чунки шу пайтгача бу у эмаслигини исботлайдиган бирорта далил топилмади. Лекин яна қайтараман: мен ДНК таҳлилини кутяпман”, дейди археолог.

Скелет ҳозирда Девентердаги археология институтида сақланмоқда. Қабрдан қолдиқлар билан бирга топилган буюмлар ҳам черковдан олиб чиқилган.

Эслатиб ўтамиз, аввалроқ Мўғулистоннинг Гоби чўлидаги Ухаа Толгод ҳудудида палеонтологлар узунлиги атиги 1 сантиметр бўлган ниҳоятда яхши сақланиб қолган скелетни топганди.