Марк Цукерберг Овал кабинетдан чиқариб юборилди – ОАВ

Meta корпорацияси раҳбари Марк Цукерберг АҚШ Президенти Дональд Трампнинг Оқ уйда жойлашган Овал кабинетидан чиқариб юборилди. Бу ҳақда ўз манбаларига таяниб, NBC News хабар берди.

Нашр манбаларига кўра, Цукерберг кутилмаганда Президент кабинетига кириб келган. Шу вақтда у ерда ҳарбий раҳбарлар билан янги F-47 русумидаги кўринмас қирувчи самолёт муҳокама қилинаётган бўлган.

“Ижтимоий тармоқ магнатининг махфий маълумотларга рухсати йўқлигидан хавотирга тушган расмийлар уни ташқарида кутиб туришини сўрашди”, дейилади хабарда.

Учрашув чоғида ёш аёл ёрдамчи ҳам кабинетга кириб, Президентга ноутбукда ниманидир кўрсатган ва чиқиб кетган. Нашрнинг ёзишича, ҳарбийлар олий бош қўмондон билан бўлаётган бу учрашувда махфийликнинг юқорироқ даражада таъминланишини кутган ва айримлари учрашувдан “ҳайратланган ва бироз хавотирланган” ҳолда чиқиб кетган. Улардан бири ҳатто маълумотлар сизиб чиқиши эҳтимоли ҳақида ўйлаганини айтган.

Бироқ “New York Post”га изоҳ берган Оқ уйнинг юқори мартабали вакили Марк Цукербергни ҳеч ким кабинетдан чиқариб юбормаганини билдирган.

“Уни чиқиб кетишини сўрашмаган. У Президент илтимосига биноан кириб саломлашган, сўнг ўз учрашуви бошланишини кутиш учун чиқиб кетган. Бу учрашув кейинроқ бўлиши керак эди”, дейди у.

Маълумот учун, F-47 – бу Boeing томонидан Америка Қўшма Штатлари Ҳарбий ҳаво кучлари (USAF) учун Next Generation Air Dominance (NGAD) дастури доирасида ишлаб чиқилаётган самолёт. У Lockheed Martin томонидан ишлаб чиқарилган F-22 Raptor самолётининг ўрнини босувчи сифатида кўрилмоқда. USAF расмийларига кўра, экспериментал синовлар 2020 йилдан бери амалга оширилмоқда ва ҳарбий ҳаво кучлари уни шу ўн йилликнинг охиригача фойдаланишга топширишни мақсад қилган. Шунда у АҚШнинг биринчи олтинчи авлод жанговар самолёти бўлади.