Мамдани мустақиллик кунига аталган нутқида Трампнинг сиёсатини қоралади (видео)

Нью-Йорк мэри Мамдани АҚШ мустақиллигининг 250 йиллиги муносабати билан муҳожирларни қўллаб-қувватловчи нутқ сўзлади. Бу ҳақда “The Guardian” хабар берди.

Қайд этилишича, Нью-Йорк мэри Зоҳран Мамдани АҚШ мустақиллигининг 250 йиллиги муносабати билан сўзлаган нутқида мамлакат ва шаҳар тараққиётида муҳожирларнинг ўрнини алоҳида таъкидлаган. Унинг чиқиши Президент Дональд Трампнинг оммавий депортация сиёсатига ғоявий жавоб сифатида баҳоланган.

Нью-Йорк шаҳар ҳокимияти биносида, АҚШнинг биринчи президенти Жорж Вашингтон фойдаланган тарихий иш столи ортидан нутқ сўзлаган Мамдани атрофига ўзи каби фуқароликка кейинчалик қабул қилинган америкаликларни тўплаган ва шаҳарни шакллантирган муҳожирлар тўлқинларини эслаган.

“Юз минглаб ирланд муҳожирлари мустамлакачилик сиёсати келтириб чиқарган очарчиликдан қочиб келди. Хитойлик денгизчилар бугунги Чайнатаунга асос солди. Миллионлаб одамлар Озодлик ҳайкали ва Эллис ороли орқали кириб келди. Яҳудийлар қирғинлардан, италияликлар қашшоқликдан, сурияликлар эса иқтисодий имконият излаб келди”, деган Мамдани.

Унинг айтишича, федерал ҳукумат томонидан қабул қилинган чекловчи қонунларга ва бошқа қийинчиликларга қарамай, муҳожирлар Нью-Йоркда ўз уйини қурган ва айнан улар Нью-Йоркни бугунги қиёфасига келтиришга ёрдам берган.

Бир неча кун аввал АҚШ Олий суди туғилган жойига қараб фуқаролик бериш ҳуқуқини бекор қилишга қаратилган Дональд Трамп ташаббусини рад этган эди.

“Ҳар бир авлод америкаликлар ҳаёт, эркинлик ва бахтга интилиш ҳуқуқи ўзларига ҳам тегишли эканини талаб қилиб келган. Бу ўтмишда қолган мерос эмас”, деган Мамдани бу қарорга ишора қилиб.

Угандада туғилиб, етти ёшида оиласи билан Нью-Йоркка кўчиб келган ва 2018 йилда АҚШ фуқаролигини олган Мамдани тарихий мисоллар келтириб, Америка демократияси Филадельфияда шаклланган бўлса-да, 1776 йилда Нью-Йорк ҳам Британия мустамлакачилигига қарши курашнинг муҳим марказларидан бири бўлганини таъкидлаган.

Мамдани, шунингдек, ҳозирги Нью-Йорк 1776 йилда Жорж Вашингтон кўрган шаҳардан бутунлай фарқ қилишини билдирган. Шу билан бирга, у Дональд Трамп сиёсатини ҳам танқид қилган.

“Қудрат эгалари Американи фақат айримларга эркинлик берилган устунлик майдони деб билади. Уларга кўра, Америка қанча кўп одамни қабул қилса, шунча заифлашади. Улар Америка фақат тўғри талаффузга ёки тўғри тери рангига эга одамларга тегишли, деб ҳисоблайди”, деган Мамдани.

Қайд этилишича, сўнгги кунларда Мамдани қўллаб-қувватлаган уч нафар демократ-социалист номзод Нью-Йоркдаги сайловларда ғалаба қозонган. Шунингдек, Филадельфия, Денвер ва Вашингтон каби шаҳарларда ҳам шу сиёсий қарашдаги номзодлар кутилгандан яхшироқ натижа кўрсатган. Нутқи якунида Мамдани жамиятни бўлишга уринаётганларга қарши туришга чақирган.

“Жамиятни бўлиш сиёсатдаги энг эски ва энг арзон усулдир”, деган у.

Шунингдек, у ватанпарварлик тушунчасига ҳам ўз муносабатини билдирган.

“Ватанпарварлик мамлакатни нуқсонсиз деб кўрсатиш эмас. Ватанпарварлик – адолат учун ҳар бир норозилик, ҳар бир юриш ва ўз вақтидан олдин ўтказилган ҳар бир намойишдир. Биз бу мамлакатни яхши кўрганимиз учун уни тарк этмаймиз”, деб таъкидлаган Нью-Йорк мэри.

Эслатиб ўтамиз, аввалроқ АҚШ Президенти Дональд Трамп мамлакат мустақиллигининг 250 йиллигига бағишланган байрам тадбирларини Жанубий Дакота штатидаги Маунт-Рашмор ёдгорлигида нутқ сўзлаш билан бошлади. У ўз чиқишида мамлакатдаги “коммунистик таҳдид” ҳақида гапириб, уни қўллаб-қувватловчиларни “1776 йил 4 июль душманлари” деб атаганиҳақида хабар берилган эди.