Мальдини Пирло билан боғлиқ жанжал сабаб истеъфога чиқиши мумкин

Италия футбол федерацияси (FIGC) техник директори Паоло Мальдини, агар ташкилот Андреа Пирлони миллий терма жамоанинг бош мураббийи этиб тайинлашга тўсқинлик қилса, истеъфога чиқиш масаласини кўриб чиқмоқда. Бу ҳақда “La Gazzetta dello Sport” нашри хабар берди.

Манбага кўра, Мальдини FIGC’даги лавозимни янги бош мураббийни мустақил танлаш ҳуқуқи сақлаб қолиниши шарти билан қабул қилган. Агар федерация раҳбарияти Пирло номзодини рад этса, у буни ўз ваколатларининг чекланиши сифатида баҳолаши ва лавозимини тарк этиши мумкин.

Аввалроқ Мальдини Антонио Конте ва Роберто Манчиниларнинг номзодларини рад этгани ҳақида хабарлар тарқалган эди. Таъкидланишича, у Контенинг тез-тез клуб алмаштиришидан норози бўлган, Манчинининг эса 2023 йилда Италия терма жамоасини тарк этганидан кейинги фаолиятини етарлича ишончли деб ҳисобламаган.

Хосеп Гвардиола билан музокаралар муваффақиятсиз якунланганидан сўнг, Мальдини ва федерация маслаҳатчиси Леонардо 47 ёшли Андреа Пирло номзодида тўхташган. Улар Пирлонинг замонавий футбол концепциясига мос келишига ишонган.

Бироқ Пирлонинг Россия букмекерлик компаниясининг глобал элчиси сифатидаги фаолияти баҳс-мунозараларга сабаб бўлиб, унинг тайинланиш жараёнини мураккаблаштирди.

Пирло бу масала юзасидан баёнот бериб, сиёсатга алоқадор эмаслигини таъкидлаган. Шунга қарамай, Италия футбол федерацияси президенти Жованни Малаго унинг тайинланиши бўйича жараённи вақтинча тўхтатиб қўйди.