Макрон гиёҳванд модда қабул қилдими? (видео)

Ижтимоий тармоқларда Франция Президенти Эммануэль Макрон Украинага кетаётган поездда қандайдир ўрамни яширгани ва бу гиёҳванд модда бўлиши мумкинлиги ҳақида гап-сўзлар урчиди. Мазкур ҳолат юзасидан Елисей саройи муносабат билдирди.

Расмий муносабатга кўра, Франция етакчиси олиб ташлаган бу ўрам ҳеч қандай гиёҳванд модда эмас, шунчаки салфетка.

“Видеода яширган салфетка – бу шунчаки салфетка, у ерда гиёҳванд моддалар йўқ эди”, дейилади расмий муносабатда.

Жорий йилнинг 10 май куни Макрон, Германия канцлери Фридрих Мерц ва Британия ҳукумати раҳбари Кир Стармер Киевга кетаётган вагондан олинган видеони эълон қилган. Улар журналистлар сиёсатчиларни суратга олишни бошлаганида, Макрон столдан ғижимланган салфеткани, Мерц эса кичик ошхона анжомини (кадрларда қошиқ ёки санчқи эканлиги яхши кўринмайди) олиб ташлаган. Уларнинг олдида сувли стаканлар ва ҳужжатлар солинган папкалар ҳам бўлган.

Кадрлар эълон қилинганидан сўнг, ижтимоий тармоқларда Макрон кокаинни яшириши мумкинлиги ҳақида изоҳлар пайдо бўлган.

“Европа бирлиги ноқулай бўлиб қолганда, дезинформация шу қадар чуқурлашиб кетадики, оддий салфеткани гиёҳванд моддага ўхшатиб қўяди. Бу сохта хабарларни Франциянинг душманлари хорижда ҳам, мамлакат ичида ҳам тарқатмоқда. Манипуляцияларга нисбатан ҳушёрликни сақлаб қолишимиз керак”, деган Елисей саройи.

Саройнинг қўшимча қилишича, салфатке бурун қоқиш учун ишлатилган.

Эслатиб ўтамиз, аввалроқ Украина пойтахти Киевда сиёсатчилар Польша Бош вазири Дональд Туск билан биргаликда Украина Президенти Владимир Зеленский билан учрашув ўтказди. Унда етакчилар АҚШ Президенти Дональд Трамп билан қўнғироқлашди. 15 дақиқалик суҳбат чоғида АҚШ етакчиси “Украина ярашувни қабул қилгани ва Россия билан тўғридан-тўғри музокараларга рози бўлгани”ни айтди. Европалик сиёсатчилар эса агар Москва ярашувга қадам ташламаса, унга қарши санкцияларни кучайтириш билан таҳдид қилган.

Макрон Киевдаги учрашувдан сўнг Украина ва Европа давлатлари учун янги давр бошланаётгани ва Европа ўзини давлат сифатида кўраётганини айтди.