Макгрегор кутилмаганда президентликка номзодини қўйиш фикридан қайтди

UFC юлдузи Конор Макгрегор яқинда ирландияликлардан мамлакат президенти лавозими учун пойгада уни қўллаб-қувватлашларини сўраган эди, бироқ у ўз номзодини қайтариб олишга қарор қилди. Бу ҳақда у бугун, 15 сентябрь куни Х ижтимоий тармоғидаги саҳифасида эълон қилди.

Макгрегор президентликка номзод бўлиш бўйича олиб борилган ишларга қарамай, у ўз номзодини қайтариб олаётганини билдирган. У ҳозирча АҚШда яшаш ва бу мамлакатда истиқомат қилаётган ирландияликларнинг ҳуқуқлари учун курашишга қарор қилганини айтган. UFC юлдузининг сўзларига кўра, қисқа муддат ичида у “Ирландияда ўзгаришларга эришган” ва “сиёсий жодугар овига қарши турган”.

“Оилам билан батафсил ўйлаб кўриб ва маслаҳатлашиб, мен бу президентлик пойгасидан ўз номзодимни қайтариб оляпман. Бу осон қарор эмас, лекин айни дамда энг тўғри қарор.

Гарчи мен бу сайловларда қатнашмасам ҳам, менинг Ирландияга бўлган садоқатим бу билан тугамайди. Мен халқимга хизмат қилишда давом этаман ва халқаро платформамдан фойдаланиб, Ирландиянинг манфаатларини чет элда илгари суришда давом этаман”, деб ёзди Макгрегор.

Шу билан бирга, у келгусида бошқа сайловларда ўз номзодини қўйишини ваъда қилди.

“Бу якун эмас, балки менинг сиёсий йўлимнинг бошланиши. Мени яшаш шароитларини яхшилаш, ҳуқуқларни ҳимоя қилиш ва ирланд халқига садоқат ҳамда ҳалоллик билан хизмат қилиш истаги ҳаракатлантирмоқда. Бу марафон. Спринт эмас!” дейди Макгрегор.

Эслатиб ўтамиз, жорий йилнинг сентябрь ойи бошида UFC юлдузи Конор Макгрегор Ирландия фуқароларига мурожаат қилиб, президентликка номзодини қўллаб-қувватлашга чақирганди. Шу йилнинг баҳорида эса у Оқ уйга ташриф буюриб, АҚШ Президенти Дональд Трамп билан учрашув ўтказган эди. Шундан сўнг Ирландия бош вазири Михол Мартин Конор Макгрегорни Оқ уйда билдирган антимиграцион баёнотлари учун қоралади. Кейинчалик жангчи Ирландия президентлигига бўладиган яқин сайловларда ўз номзодини қўйишини билдирганди.  

Қайд этиш жоиз, Макгрегор 2021 йилдан бери UFC октагонида жанг қилмаяпти. У Дастин Порье билан бўлган жангда оғир жароҳат олиб, узоқ муддат жанглардан воз кечишга мажбур бўлган.