МАГАТЭ автомобили Запорожье АЭСга кетаётганда дрон ҳужумига учради

Украинадаги Запорожье атом электр станциясига кетаётганда Атом энергияси бўйича Халқаро агентликнинг (МАГАТЭ) расмий автомобилига дрон билан зарба берилди ва унга жиддий зарар етказилди. Бу ҳақда кеча, 10 декабрь куни МАГАТЭ вакиллари Х ижтимоий тармоғида маълум қилди.

Ташкилот раҳбари Рафаэль Гросси ҳарбий можаро пайтида ядровий авариянинг олдини олиш учун ишлаётган агентлик ходимларига қилинган ҳужумни қабул қилиб бўлмайдиган ҳолат, деб атаган.

Айни пайтда Украина Президенти Владимир Зеленский содир бўлган воқеаларда Москвани айблади. Унинг сўзларига кўра, МАГАТЭ вакилларига Россиянинг First Person View дрони ҳужум қилган.

“Зарба карвондаги машиналардан бирига тегди. Ушбу ҳужум Россиянинг халқаро ҳуқуқ, халқаро институтлар ва хавфсизлик билан боғлиқ ҳамма нарсага қандай қарашини яққол кўрсатди. Улар ўз мақсадларидан бехабар қолиши мумкин эмас эди. Улар нима қилаётганларини аниқ билган ва онгли равишда ҳаракат қилган”, дейди Украина раҳбари.

Зеленскийнинг сўзларига кўра, ҳужумга жавобан ҳам МАГАТЭ, ҳам бошқа халқаро ҳамкорлар томонидан аниқ ва қатъий муносабат бўлиши керак.

“Жимлик ёки ҳаракатсизлик фақат кейинги жиноятларни рағбатлантиради”, дейди у.

Запорожье АЭС Украина ва Европадаги энг йирик атом электр станциясидир. Тўлиқ миқёсли босқиннинг биринчи ҳафталарида станция россиялик ҳарбийлар томонидан ишғол қилинган.

Эслатиб ўтамиз, аввалроқ Россия қўшинлари назоратида бўлган Запорожье атом электр станциясининг совитиш минорасида ёнғин содир бўлганди.