Мачадо Нобель мукофотини олишга улгурмади

2025 йилги Нобель тинчлик мукофоти совриндори, Венесуэла мухолифати етакчиси Мария Корина Мачадо бугун, 11 декабрга ўтар кечаси Ослога етиб келди. Бу ҳақда Нобель қўмитаси раиси Йорген Ватне Фриднес хабар берди. 

Мачадо шу тариқа маросим бўлиб ўтган кундан бир неча соатга кечикиб, расмий мукофот топшириш тадбирига етиб кела олмади.

Мачадо Ослодаги Grand Hotel меҳмонхонаси балконида кўриниб, йиғилган одамларни қутлади. У қўлини юрагига қўйиб куйлади ва кейин кўчада тўпланганларга қўшилди. Кейинроқ у X ижтимоий тармоғида шу учрашувдан фотосурат эълон қилиб: “Бутун Венесуэлага керак бўлган бағрикенглик. Раҳмат!!”, деб ёзди.

58 ёшли сиёсатчи сўнгги бир йилдан ортиқ вақт давомида Венесуэла ҳукуматидан қочиб яшар эди ва Норвегияга келиши учун мамлакатни яширинча тарк этишга мажбур бўлди. У ўн йиллик мамлакатдан чиқиш таъқиқини бузди. Унинг ўрнига Нобель тинчлик мукофотини Ослода унинг қизи – Ана Корина Соса Мачадо қабул қилиб олди.

Онаси номидан нутқ сўзлаган Корина Венесуэла ҳукуматининг “давлат терроризми”ни қоралади. Унинг қайд этишича, Президент Николас Мадуро ҳукмронлиги даврида мамлакатда тахминан 2500 киши “ўғирланган, ғойиб бўлган, қийноққа солинган”.

Мария Корина Мачадо “Венесуэла халқининг демократик ҳуқуқларини ҳимоя қилишдаги тинмай олиб борган фаолияти” учун мукофотга сазовор бўлди. Нобель қўмитаси унинг диктатурадан демократияга адолатли ва тинчлик йўли билан ўтиш жараёнига қўшган ҳиссасини алоҳида таъкидлади.

Мария Корина Мачадо – Венесуэлада Николас Мадуро ҳукуматга қарши норозилик намойишларининг етакчи шахсларидан бири. 2024 йилда у Мадуронинг расман эълон қилинган ғалабасига қарши фаол курашди. Унга сайловда иштирок этиш тақиқланганидан кейин алмаштирувчи сифатида бюллетенга киритилган мухолифат номзоди Эдмундо Гонсалес Уррутия билан бирга Мачадо яширин ҳаёт кечиришга мажбур бўлди.

Мачадонинг омма олдидаги сўнгги кўриниши қарийб бир йил аввал – 9 январда Мадуронинг инаугурациясига қарши намойишларда содир бўлган эди. 2024 йил августидан бошлаб у ерости шароитида яшаб келаётган эди.