Луис Энрике Дембелени жамоадан кетишини талаб қилди – ОАВ

Франциянинг ПСЖ жамоаси бош мураббийи Луис Энрике 2026 йил ёзида амалдаги “Олтин тўп” соҳиби Усмон Дембеленинг клубдан кетишини талаб қилди. Бу ҳақда “Fichajes” нашри хабар берди.  

Манбага кўра, испаниялик мутахассис Дембеле ПСЖдан кетган тақдирдагина клубдаги фаолиятини давом эттириш шарти қўйган.

Маълумотларга кўра, можаро бир қатор келишмовчиликлардан сўнг юзага келган. Жумладан, Дембеленинг мағлубиятдан кейинги баҳсли фикрлари ва жамоа муҳитига салбий таъсири мураббийга ёқмаган. Энрике фикрича, жамоавий интизом шахсий ютуқлардан устун гап, ҳатто “Олтин тўп” соҳиби ҳақида гап кетаётган бўлса ҳам.

Клуб раҳбарияти вазиятни юмшатиш мақсадида футболчига шартномани 2028 йилгача узайтиришни таклиф қилган. Бироқ, Дембеле йилига 60 миллион евро маош талаб қилган ва бу сумма клуб томонидан ҳаддан ташқари юқори деб топилган. Натижада, томонлар мураббий ваколатларини қўллаб-қувватлаш ёки юлдуз футболчини сақлаб қолиш танлови қаршисида қолган.

Айни пайтда Дембеле трансфер вариантларини кўриб чиқмоқда. Унинг ҳолатини Европанинг етакчи клублари ҳамда араб жамоалари диққат билан кузатиб бормоқда. 2026 йил ёзи футболчининг келажаги учун ҳал қилувчи бўлиши кутилмоқда.

Маълумот учун, жорий мавсумда Дембеле парижликлар сафида барча мусобақаларда 25 та ўйинда майдонга тушиб, 11 та гол урди ва 7 та голли узатмани амалга оширди.