Лондоннинг икки жамоаси “Барселона” футболчиси учун курашмоқда

Лондоннинг “Челси” ва “Арсенал” жамоалари январь ойида “Барселона” ҳимоячиси Марк Касадони сотиб олиш учун рақобатлашиши кутилмоқда. Каталония клуби 22 ёшли футболчини 30–35 миллион евро миқдоридаги таклифлар келиб тушса, сотишга тайёр. Бу ҳақда “Caughtoffside” нашри хабар берди.

Манбага кўра, “Челси” Касадони “ақлли сармоя” сифатида кўрмоқда ва бу трансферни қишда якунлашни режалаштирган. “Арсенал” ҳам футболчига қизиқиш билдирган ва рақобатда қатнашмоқда.

“Барселона” молиявий Фэйр-плей қоидалари доирасида қолиш учун балансни сақлаши лозим. Шу боис, клуб айрим футболчиларни, жумладан, Касадони сотишга мажбур бўлиши мумкин.

“Челси” ёзги трансфер ойнасида Фермин Лопес учун таклиф берган, аммо “Барселона” бу таклифни рад этган эди. Ўша музокараларда Касадо номи ҳам муҳокама қилинган. Энди эса Лондон клуби бу имкониятни январь ойнинг асосий трансфер мақсадларидан бири сифатида кўриб чиқмоқда.

Касадо “Челси” сафида Мойсес Кайседо ва Энцо Фернандес ортида муҳим захира сифатида хизмат қилиши мумкин. “Арсенал” эса Кристиан Нёргор ўрнига узоқ муддатли ўйинчини излаётгани айтилмоқда.

Каталония клуби учун бу трансфер молиявий барқарорликни сақлаш йўлида муҳим ҳисобланади, “Челси” эса ёш ва истиқболли ярим ҳимоячи орқали таркиб чуқурлигини оширишни мақсад қилмоқда.

Маълумот учун, Касадо жорий мавсумда “Барселона” сафида 7 та учрашувда майдонга тушган ва 1 та ассистни ўз ҳисобига ёзиб қўйган.