“Ливерпуль” Ван Дейкни сотмоқчи – ОАВ

Англиянинг “Ливерпуль” жамоаси клуб сардори Виржил ван Дейкни дахлсиз футболчи сифатида кўрмаяпти ва у бўйича тушадиган жиддий трансфер таклифларини кўриб чиқишга тайёр. Бу ҳақда “TEAMtalk” нашри хабар берди.

Манбага кўра, мавсум клуб кутганидек ўтмаганидан сўнг “Ливерпуль” раҳбарияти жамоанинг бир қатор етакчи футболчилари бўйича ўз позициясини қайта кўриб чиққан. Ван Дейк 2025 йилда янги шартнома имзолаган бўлса-да, клуб 35 ёшли ҳимоячи учун муносиб ва жиддий таклиф тушса, уни кўриб чиқишга тайёр.

Голландиялик ҳимоячига бир қатор клублар қизиқиш билдирмоқда. “Милан”нинг янги бош мураббийи Рубен Аморим Ван Дейкни трансфердаги устувор мақсадларидан бири деб ҳисобламоқда. Шунингдек, Туркиянинг “Галатасарой” ва “Фенербахче” клублари, Саудия Арабистони Про-лигаси жамоалари ҳамда MLS клублари ҳам футболчига қизиқиш билдирган.

Шу билан бирга, “Ливерпуль” сардори билан шунчаки хайрлашиш ниятида эмаслиги таъкидланмоқда. Жамоанинг янги бош мураббийи Андони Ираола ҳам унинг кетишини талаб қилмаяпти. Ван Дейкнинг келажаги бўйича якуний қарор фақат клубни тўлиқ қониқтирадиган жиддий трансфер таклифи келиб тушган тақдирдагина қабул қилиниши мумкин.