“Ливерпуль” АПЛ тарихидаги энг йирик ҳомийлик шартномасини имзолади

Turkish Airlines компанияси 2027 йилдан Англиянинг “Ливерпуль” клуби бош ҳомийсига айланади ва бу Англия Премьер-лигаси тарихидаги энг қиммат титул ҳомийлиги келишувига айланади. Бу ҳақда “The Times” нашри хабар берди.

Манбага кўра, томонлар ўртасидаги ҳамкорлик 2027 йил 1 июндан бошланади. Туркия авиакомпанияси 2027-2028 йилги мавсумдан “Ливерпуль”нинг эркаклар, аёллар ва академия жамоалари либосининг олд қисмида ўз логотипини жойлаштиради. Шу тариқа 2010 йилдан буён клубнинг асосий ҳомийси бўлиб келаётган Standard Chartered ўрнини Turkish Airlines эгаллайди.

“The Times” маълумотига кўра, беш йиллик шартнома 300 миллион фунтдан ортиқ қийматга эга бўлиб, Англия Премьер-лигаси тарихидаги энг қиммат либос ҳомийлиги келишувига айланади.

Standard Chartered эса 2027 йилдан клубнинг глобал ҳамкори сифатида “Ливерпуль” билан ҳамкорликни давом эттиради. Банк 2010 йилда клубнинг асосий ҳомийсига айланган ва унинг шартномаси 2026-2027 йилги мавсум охирига қадар амал қилади.

Маълумот учун, “Ливерпуль” Англиянинг 20 карра чемпиони, олти карра Европа Чемпионлар лигаси ғолиби ва тўрт карра UEFA Суперкубоги соҳиби ҳисобланади.