Ливан ва Исроил “Ҳизбуллоҳ” назоратига қўшин юборадиган давлатлар рўйхатини тузди

Ливан ва Исроил АҚШ воситачилигидаги келишув доирасида “Ҳизбуллоҳ”ни қуролсизлантириш жараёнини назорат қилиш учун қўшин юбориши мумкин бўлган давлатларнинг қисқа рўйхатини келишиб олди. Бу ҳақда ливанлик расмий ҳукумат вакили маълум қилди.

Унинг айтишича, энди рўйхатдаги давлатлар орасидан қайсилари танланишини АҚШ ҳал қилади. Расмий рўйхатдаги давлатлар сони ва уларнинг номларини ошкор қилмаган. Рўйхат шу ҳафта Римдаги АҚШ элчихонасида бўлиб ўтган Ливан ва Исроил музокаралари давомида шакллантирилган. 

Қайд этилишича, келишув Исроил қўшинларининг Ливандан босқичма-босқич чиқиб кетишини “Ҳизбуллоҳ”ни қуролсизлантириш билан боғлайди ва жараён учинчи томон томонидан текширилишини назарда тутади. Бироқ “Ҳизбуллоҳ” келишувни ва ўз қурол-яроғидан воз кечишни рад этган.

“Биз давлатларнинг қисқа рўйхатига эришдик. Ҳар бир томон қайси иштирокчиларни қабул қила олмаслигини белгилади ва эҳтимолий иштирокчиларни танлади. Энди америкаликлар қарор қабул қилади ва бир нечта давлатни танлаши мумкин”, деган ливанлик расмий.

Ливан хусусий хавфсизлик компанияларининг “Ҳизбуллоҳ”ни қуролсизлантиришни назорат қиладиган учинчи томон сифатида иштирок этиши ҳақидаги аввалги таклифни рад этган. Энди хорижий кучларнинг сони, уларнинг вазифалари ва Ливан армияси билан ҳамкорлиги бўйича келишиши керак.

Маълумотларга кўра, хорижий қўшинлар Ливандаги БМТ тинчликпарвар миссияси – UNIFIL таркибида жойлаштирилиши мумкин. Бунинг учун БМТ Хавфсизлик кенгашининг янги резолюцияси талаб этилади. Бошқа вариантлар қаторида уларни БМТнинг алоҳида агентлиги таркибида жойлаштириш ёки Ливан билан ўзаро англашув меморандуми асосида фаолият юритиш ҳам кўриб чиқилмоқда.

Музокараларда Исроил қўшинлари кейинги босқичда қайси ҳудуддан чиқиб кетиши масаласида келишувга эришилмаган. Байрут Исроил қўшинлари томонидан жиддий зарар кўрган Бинт Жбейл ва Хиам шаҳарларини таклиф қилган.

Кейинги музокаралар сентябрь ойининг бошида ўтказилиши режалаштирилган.

Эслатиб ўтамиз, жорий йилнинг 19 июнь куни Исроил ва Ҳизбуллоҳ ўртасида ўт очишни тўхтатиш бўйича келишувга эришилган эди.