Коутиньо Неймарнинг жамоадошига айланади

Бразилиянинг “Сантос” жамоаси Филиппе Коутиньони трансферини расмийлаштирди. “Ливерпуль” ва “Барселона”нинг собиқ футболчиси жамоага эркин агент сифатида қўшилиб, йил охирига қадар шартнома имзолади. Бу ҳақда инсайдер Фабрицио Романо хабар берди.

34 ёшли ярим ҳимоячининг трансфери Неймар жароҳат олганидан сўнг амалга оширилди. Бразилиялик ҳужумчи ўнг оёғидаги сон мушагидан жароҳат олган ва мавсумнинг маълум қисмини ўтказиб юборади.

“Сантос” Бразилия футболи элитасидаги ўрнини сақлаб қолиш учун Коутиньонинг тажрибасига таянмоқда. Айни пайтда клуб чемпионатда қуйи лигага тушиб кетиш хавфи бўлган зонанинг яқинида жойлашган.

Маълумот учун, Коутиньонинг профессионал фаолияти айнан “Васко да Гама”да бошланган. Кейинчалик у Европага йўл олиб, “Ливерпуль”даги ўйинлари орқали катта шуҳрат қозонди. 2018 йил январь ойида “Барселона” Филиппе Коутиньо учун “Ливерпуль”га 135 миллион евро тўлаган эди. Бироқ бразилиялик футболчининг каталонияликлар сафидаги фаолияти кутилганидек кечмади.

Коутиньо “Васко да Гама”дан кетганидан сўнг, жорий йилнинг февраль ойидан буён янги жамоа қидираётган эди.