Коронавирус хавфи: Россия Туркия билан авиақатновларни 1,5 ойга чеклади

Россия Федерацияси янги коронавирус инфекциясини олиб кирилишининг олдини олиш учун 15 апрелдан 1 июнгача Туркия билан мунтазам ва чартер рейсларни чекламоқда. Бу ҳақда Россия Федерацияси Бош вазирининг ўринбосари Татьяна Голикова кеча, 12 апрель куни ҳукумат уйида бўлиб ўтган брифингда маълум қилган.  

"Биз Россиянинг халқаро аэропортларидан Туркия аэропортларига ва тескари йўналишда мунтазам ва чартер рейсларни жорий йилнинг 15 апрелидан шу йилнинг 1 июнигача чеклаш тўғрисида қарор қабул қилдик. Титан-2 концерн-акциядорлик жамиятининг атом электр станциясини қуришда иштирок этиши учун зарур бўлган ҳолатлар бундан мустасно”, дейди Голикова.

Унинг қайд этишича, ўзаро асосда ҳафтасига иккита Истанбул – Москва, Москва – Истанбул рейслари давом эттирилади. 

Бундан ташқари, Россия ва Танзания ўртасида ҳам парвозлар 15 апрелдан 1 июнгача тўхтатилади. 

"Эпидемиологик маълумотлар таҳлили асосида биз Танзания Бирлашган Республикаси билан парвозларни тўхтатишга қарор қилдик”, дейди Бош вазир ўринбосари.

Агар ушбу мамлакатларда коронавирус билан боғлиқ вазият барқарорлашса, Танзания ва Туркия билан ҳаво қатнови тикланади. 

Айни вақтда туроператорларга ушбу муддат давомида Россия Федерацияси ҳудудидан Туркияга чипталарни сотишни тўхтатиш тавсия этилмоқда. Голикова бу қарорга руслар ҳаётини, шунингдек мамлакатда коронавирус билан боғлиқ барқарор вазиятни сақлаб қолиш учун келинган, деб тушунтирди.  

"Тезкор штаб ҳаво қатнови очиқ бўлган мамлакатларда инфекциянинг тарқалишини доимий равишда кузатиб боради ва ушбу таҳлил асосида тезкор штаб эпидемиология ёмонлашган тақдирда авиация транспортининг очилиши ёки чекланиши мақсадга мувофиқлиги тўғрисида қарор қабул қилади”, дея қўшимча қилди у. 

Маълумотларга кўра, 500 мингдан ортиқ россияликлар 15 апрелдан 31 майгача бўлган даврда Туркияга саёҳат учун тур-пакетлар буюртма қилган. Уларнинг умумий қиймати 32 миллиард рублни ташкил этади. Россиялик сайёҳлар орасида Танзанияга бўлган талаб сезиларли даражада паст – фақат апрель ойи ва май ойлари учун 6-7 минг сайёҳат буюртма қилинган.

Жорий йилнинг 8 ва 9 апрель кунлари Туркия Соғлиқни сақлаш вазирлиги бутун пандемия даврида коронавирус инфекциясининг кунлик энг катта ўсишини қайд этди – кунига 55 мингдан ортиқ ҳолат. 11 апрель куни Туркия коронавирус юқтириш ҳолатлари сони бўйича дунёда еттинчи ўринни эгаллади (3 798 333). Шу билан бирга, 8 апрель куни Роспотребнадзор раҳбари Анна Попова янги коронавирус штаммларининг кўпи Россияга Туркиядан кириб келаётганини таъкидлади.