Константиновка бўйича даъво Россиянинг навбатдаги ёлғони – Зеленский

Аввалроқ, Россия Мудофаа вазирлиги ҳарбийлари Донецк вилоятидаги муҳим шаҳарлардан бири бўлган Константиновка устидан назорат ўрнатгани ҳақида маълум қилган эди. Украина Президенти Владимир Зеленский Россиянинг Донецк вилоятидаги стратегик аҳамиятга эга Костиантиновка шаҳрини эгаллагани ҳақидаги даъволарни рад этди. Бу ҳақда у ўзининг X ижтимоий тармоғидаги саҳифасида ёзиб қолдирди.

Қайд этилишича, Россия ҳарбийлари бугун, 4 июль куни Президент Владимир Путинга Костиантиновка шаҳри тўлиқ назоратга олингани ҳақида ҳисобот берган. Бироқ Зеленский ва Украина Бош штаби шаҳар ҳамон Украина Қуролли кучлари назорати остида эканини маълум қилди.

“Албатта, бу – ҳақиқат эмас. Бу Россиянинг навбатдаги ёлғони ва қандайдир шов-шувли хабар яратишга уринишдир”, деб ёзган Зеленский.

Шунингдек, агар Костиантиновка чиндан ҳам Россия назоратида бўлганида, Россия Президенти Владимир Путин у билан айнан шу шаҳарда учрашиб, урушни дипломатик йўл билан якунлаш масаласини муҳокама қилишдан бош тортмаган бўларди.

Украина Бош штабининг билдиришича, Шарқий қўшинлар гуруҳи таркибидаги 19-армия корпуси бўлинмалари шаҳарда ва унга туташ ҳудудларда мудофаани давом эттирмоқда.

Маълумот учун, Костиантиновка Донецк вилоятидаги Украина мудофаа тизимининг муҳим таянч нуқталаридан бири ҳисобланади. Ҳарбий таҳлилчиларга кўра, ушбу шаҳар қўлга киритилса, Россия қўшинлари шимол йўналишида ҳужумни ривожлантириш учун қулай таянчга эга бўлади.

Эслатиб ўтамиз, аввалроқ Россиянинг иккинчи йирик шаҳри Санкт-Петербург ва уни ўраб турган Ленинград вилояти Украина томонидан амалга оширилган йирик дрон ҳужумига учрагани ҳақида хабар берилган эди.