Конгрессмен Трампга импичмент эълон қилишга чақирди

АҚШнинг Мериленд штатидан бўлган конгрессмен-демократ Эйприл Делани Венесуэладаги ноқонуний ҳаракатлар Президент Дональд Трампнинг импичмент (лавозимдан озод этилиши – таҳр. ) учун асос бўлишини айтди. 

“Ўтган дам олиш кунлари биз Президент – Конституциямиз талаб қилганидек, Конгресснинг рухсати ёки розилигисиз – Венесуэлага ҳужум бошлагани ва мамлакатни “бошқариш” ниятини эълон қилганига гувоҳ бўлдик. Энди бизнинг демократик фракциямиз тез орада импичмент жараёнини бошлаш масаласини кўриб чиқиши керак, деб ҳисоблайман”, дейилади сиёсатчи сайтидаги пресс-релизда. 

Аввалроқ, Трамп Демократик партия унга Владимир Зеленскийдан "фирибгарлик қилмаслик"ни сўрагани, шунингдек, Украина расмийларини коррупцияга йўл қўймаслик ҳақида огоҳлантиргани учун импичмент эълон қилишга уринганини айтганди. Трамп 2019 йилда улар ўртасида бўлиб ўтган телефон суҳбатини эслаган. 

“Мен Украинага фирибгарлик қилмасликни айтдим.  Агар сиз бирон бир фирибгарликни кўрсангиз, бу ҳақда АҚШ Бош прокурорига хабар беринг. Менинг қўнғироқ қилишимнинг маъноси шу эди. Улар (Демократик партия вакиллари – таҳр.) айтди: у уларни қўрқитмоқчи бўлган," - деди Америка этакчиси АҚШ Конгресси Вакиллар палатасидаги республикачи партиядошлар фракцияси олдида чиқиш қилар экан.

Гап Украинанинг Burisma энергетика компанияси билан боғлиқ можаро ҳақида кетмоқда: 2014 йилда унинг директорлар кенгашига Хантер Байден аъзо бўлган. У буни отаси Жо Байден АҚШ вице-президенти лавозимини эгаллаб турган пайтда амалга оширган. Кўп ўтмай, Америка оммавий ахборот воситалари Хантер отасининг ёрдами билан Burisma манфаатларини ҳимоя қилиш имкониятига эга бўлгани ва бунинг эвазига катта миқдорда пул олиши мумкинлиги ҳақида ёза бошлади. Баъзи республикачиларнинг таъкидлашича, бу пулларнинг бир қисмини у отасига берган бўлиши мумкин.

2019 йилда Burisma’даги коррупция ва Жо Байденнинг Украина ишларига аралашуви бўйича Трампнинг адвокати Руди Жулиани суриштирув ўтказа бошлади. 2019 йил 25 июлда Зеленский билан телефон орқали суҳбатда Трамп бир неча бор Жулиани олиб бораётган терговга кўмаклашишга чақирган. АҚШ Конгрессидаги демократлар бу чақириқларни хорижий давлат раҳбарига босим ўтказишга уриниш деб баҳолади ва Трампга нисбатан импичмент жараёнини бошлади.

Burisma билан боғлиқ можаро 2020 йилги АҚШ президентлик сайловларидан бир йил олдин бошланган. Демократлар Трамп Жулиани суриштируви ёрдамида Жо Байденнинг президентлик пойгасида ғалаба қозонишига тўсқинлик қилмоқчи, деган фикрни билдирган. Натижада 2020 йилги сайловларда Байден ғалаба қозонди, бироқ Трамп 2024 йилги сайловларда ғолиб чиқди.