Колумбияда йўловчи самолёти қулаб тушди. Қурбонлар бор (видео)

Кеча, 28 январь куни Колумбияда бортида экипаж аъзолари ва йўловчиларни қўшиб ҳисоблаганда, 15 киши бўлган Beechcraft 1900 русумли йўловчи самолёти ҳалокатга учради, тирик қолганлар йўқ. Бу ҳақда Фуқаролик авиацияси ва Транспорт вазирлиги томонидан ташкил этилган қўшма штабга таяниб, “El País” газетаси хабар берди.

Нашрга кўра, HK4709 борт рақамига эга ҳаво кемаси билан сўнгги алоқа Колумбия вақти билан соат 11:54 да, у Кукута шаҳридан учиб чиққанидан 12 дақиқа ўтиб ўрнатилган.

Caracol нашрининг ёзишича, самолёт Кукутадаги Камило Даса аэропортидан учиб чиққан ва тахминан соат 12:05 да Окания муниципалитетидаги Агуас-Кларас аэропортига етиб бориши керак бўлган.

Самолёт Колумбиянинг Satena авиакомпаниясидан Searca тижорий йўловчи чартер авиакомпанияси томонидан ижарага олинган бўлган.

Самолётнинг координаталари охирги бор Плая-де-Белен ва Хакари муниципалитетлари орасидаги тоғли ҳудуд устида қайд этилган. Кейинчалик Сатена маҳаллий вақт билан соат 14:00 га келиб самолётнинг ёқилғи захираси тугаганини маълум қилган. Авиакомпания, шунингдек, самолётнинг фавқулодда радиомаёғи ишга тушмаганини билдирган.

Шимолий Сантандер хавфсизлик бўйича котиби Хорхе Кинтеро C га самолётни ушбу ҳудуд аҳолиси топганини айтди.

“Улар самолётни бутунлай вайрон бўлган ҳолатда топган ва ҳозирча бирорта ҳам тирик қолганлар ҳақида бизга хабар беришмади”, дейди Кинтеро.

Йўловчилар орасида Вакиллар палатасининг амалдаги аъзоси Диогенес Кинтеро Амайя ҳамда номзод Карлос Салседо ҳам бўлган. Улар ички можародан энг кўп зарар кўрган ҳудудлар вакиллари учун мўлжалланган махсус сайлов квотаси – “тинчлик ўринлари” бўйича сайловда иштирок этаётган бўлган (Кинтеро қайта сайланиш учун).

Гап Колумбия ҳукуматининг Колумбия Инқилобий қуролли кучлари (FARC) билан бўлган можароси ҳақида бормоқда. Колумбия ҳукумати 2016 йилда 50 йил давом этган қуролли қарама-қаршиликдан сўнг FARC исёнчилари билан якуний тинчлик келишувини имзолаган.