Клинтондан фарқли ўлароқ, Эпштейн оролида бўлмаганман – Трамп 

АҚШ Президенти Дональд Трамп собиқ давлат раҳбари Билл Клинтондан фарқли ўлароқ, у бир неча йил аввал болаларга зўравонлик ва бошқа шу каби оғир жиноятларда айбланган америкалик молиячи Жеффри Эпштейнга тегишли оролда бўлмаганини айтди. Бу ҳақда у бугун, 25 июль куни Оқ уйнинг жанубий майсазорида журналистлар билан суҳбатда маълум қилди.

“Оролда 28 марта бўлган Билл Клинтон ҳақида гапиришингиз керак. Мен ҳеч қачон оролда бўлмаганман”, деди Трамп. 

У, шунингдек, “The Wall Street Journal” газетасининг Эпштейннинг 50 ёшга тўлиши муносабати билан унга яланғоч аёлнинг қўлда чизилган сурати билан табрик хати жўнатгани ҳақидаги иддаоларини ҳам рад этди 

“Нима ҳақида гапираётганингизни ҳам билмайман. Кимдир хат ёзиб, менинг исмимни ишлатган бўлиши мумкин, лекин бу кўп марта содир бўлганҳ”, деб таъкидлади Америка раҳбари.

WSJ манбаларга таяниб хабар беришича, АҚШ бош прокурори Пам Бонди баҳорда Трампга унинг исми Эпштейннинг ҳужжатларида борлиги ҳақида хабар берган. Нашрнинг ёзишича, Трамп ҳужжатларда кўп марта учрайди.

Молиячи 2019 йилнинг 6 июлида Нью-Йорк штати ҳуқуқ-тартибот идоралари томонидан ҳибсга олинган. Прокуратуранинг таъкидлашича, у 2002-2005 йилларда ўзининг Манхэттендаги уйига ўнлаб вояга этмаган, энг кичиги 14 ёшда бўлган қизларни олиб боргани ҳақида далиллар бор. Эпштейннинг дўстлари ва танишлари орасида нафақат АҚШда, балки бошқа кўплаб мамлакатларда амалдаги ва нафақадаги амалдорлар (шу жумладан собиқ давлат раҳбарлари), йирик тадбиркорлар ва шоу-бизнес юлдузлари бор эди. 2019 йил 10 августда қамоқхона камерасида ўз жонига қасд қилгандан сўнг, АҚШда молиячига нисбатан жиноий таъқиблар тугатилди.

Шу билан бирга, Трамп ва унинг жамоаси аъзолари 2024 йилги сайлов кампанияси давомида Эпштейн иши бўйича тергов ҳужжатларини махфийликдан чиқаришга ва бу воқеада максимал шаффофликни таъминлашга бир неча бор ваъда беришган. Трамп, Бонди ва бошқа АҚШ маъмурияти расмийларининг тушунтиришлари амалдаги Америка президенти тарафдорларининг катта қисми орасида ғазабга сабаб бўлди. Бу сайловчилар Эпштейн иши бўйича тўлиқ маълумот нашр этилишини талаб қилмоқда.

Эслатиб ўтамиз, АҚШ Президенти Дональд Трамп 21 июль куни ўзининг Truth Social ижтимоий тармоғига сунъий интеллект ёрдамида яратилган, Федерал қидирув бюроси ходимлари АҚШнинг собиқ президенти Барак Обамани ҳибсга олгани акс этган видеони жойлаштирганди. 

Президент, шунингдек, ўз саҳифасида Габбарднинг даъвосини 17 марта эълон қилди. Бу эса жамоатчилик муҳокама қилаётган мавзуни ўзгартиришга уринишдек туюлди. Маълумки, сўнгги пайтларда Трампнинг 2019 йил август ойида қамоқда вафот этган миллиардер педофил ва жинсий савдогар Жеффри Эпштейн билан ўтмишдаги муносабатлари кенг муҳокама қилинмоқда. Трамп маъмурияти икки ҳафта олдин Эпштейннинг “мижозлар рўйхати” мавжуд эмаслигини ва молиячи Нью-Йоркдаги қамоқхонада ўз жонига қасд қилганини эълон қилиб, шов-шувга сабаб бўлди. Бу Эпштейн қурбонлари учун адолат ва унинг ёрдамчилари жазоланишини талаб қилган Президентнинг ўз тарафдорларини ҳам ғазаблантирди.