КХДР денгизга бир нечта баллистик ракета учирди

Бугун, 22 октябрь куни Сеулда Жанубий Корея ва АҚШ Президентлари учрашуви арафасида Корея халқ демократик республикаси мамлакатнинг шарқий соҳилидаги денгиз томонга қисқа масофали баллистик ракеталарни учирди. Бу ҳақда “Chosun” нашри хабар берди.

Жанубий Корея бирлашган штаб бошлиқлари қўмитасининг маълум қилишича, бир нечта снарядлар аниқланган, улар, эҳтимол, қисқа масофали баллистик ракеталар бўлган. Бу 2025 йил июнь ойида янги Президент Ли Че Мён лавозимига киришганидан бери КХДР томонидан амалга оширилган биринчи бундай синовдир. Олдинги ракета учирилиши май ойида содир бўлган эди.

Япониянинг янги бош вазири Санаэ Такаити эса Пхеньяннинг ракета учириши мамлакат хавфсизлигига таъсир қилмаганини айтиб, Токио АҚШ билан реал вақт режимида маълумот алмашаётганини маълум қилган.

Жанубий Корея ва АҚШ Президентлари кейинги ҳафтада Сеулда бўлиб ўтадиган Осиё-Тинч океани иқтисодий ҳамкорлик (APEC) саммитида учрашиши режалаштирилган. Шунингдек, АҚШ Президенти Дональд Трамп ўша ерда Хитой Раиси Си Цзиньпин билан ҳам учрашиши кутилмоқда.

Эслатиб ўтамиз, 2025 йил 11 октябрь куни Шимолий Корея раҳбари Ким Чен Ин Пхеньянда икки йилдан бери биринчи марта йирик ҳарбий парад ўтказди. Унда янги қитъалараро “Хвасон-20” ракетаси илк бор намойиш этилди.

Давлат ахборот агентлиги уни “энг кучли ядровий стратегик қурол” деб атади. Унга кўра, бу ракета Шимолий Кореяга АҚШ ҳудудидаги нишонларга зарба бериш имконини бериши мумкин. “Хвасон-20”дан ташқари, КХДР армияси парадда гипертовушли ракеталар ҳамда бошқа турдаги қуролларни ҳам кўрсатди.

Тадбир меҳмонлари орасида Хитой Бош вазири Ли Сян, Россия Хавфсизлик кенгаши раиси ўринбосари Дмитрий Медведев ва Вьетнам Коммунистик партияси бош котиби То Лам бор эди.