Киевнинг ядро қуролидан воз кечиши аҳмоқлик бўлган – Зеленский

Украина раҳбарияти 30 йил аввал ядро қуролидан воз кечганини хато деб ҳисоблайди ва Россия билан узоқ муддатли тинчликка эришиш фақат АҚШ ёрдамида амалга ошиши мумкин. Бу ҳақда Украина Президенти Владимир Зеленский Италиянинг “Il Foglio” газетасига берган интервьюсида айтди.

Зеленскийнинг сўзларига кўра, АҚШ ва Россия Украинани ядровий қуролдан воз кечишга мажбур қилган, бу рад этиш “аҳмоқона, мантиқсиз ва ўта масъулиятсизлик” бўлган.

Гап 1994 йилда имзоланган Будапешт меморандуми ҳақида кетмоқда, унга кўра Украина АҚШ, Россия ва Буюк Британиянинг хавфсизлик кафолатлари, жумладан, Украинанинг мустақиллиги, суверенитети ва мавжуд чегараларини ҳурмат қилиш эвазига ўзининг ядровий арсеналидан воз кечади.

Украина раҳбарининг фикрича, Киев ядро қуролини “ҳақиқий хавфсизлик кафолатларига, кейин эса НАТОга” алмашиши керак эди.

“Агар мен ядровий қуролни ўзгартирмоқчи бўлсам, уни буюклиги, ҳудуди ва армиясига қарамай, ҳар қандай ҳужумчини тўхтата оладиган жуда кучли нарсага алмаштирган бўлардим”, дея таъкидлаган у.

Россия Украина учун нейтрал ва ядросиз мақомга эга бўлишини таъкидламоқда. Путиннинг таъкидлашича, Москва ҳеч қандай шароитда ҳам Украинада ядровий қурол пайдо бўлишига йўл қўймайди. Акс ҳолда, Россия томони барча мавжуд йўқ қилиш воситаларидан фойдаланади, дея огоҳлантирган у. Украинанинг НАТОга киришдан бош тортиши Путин томонидан 2024 йилнинг ёзида тинчлик музокараларини бошлаш учун илгари сурилган шартлардан биридир.

Россия Хавфсизлик кенгаши раиси ўринбосари Дмитрий Медведев Киевнинг ядровий дастурини қайта тиклаш борасидаги таҳдидини Украинада ҳарбий ҳаракатлар бошланиши сабабларидан бири деб атади.

Эслатиб ўтамиз, жорий йилнинг 16 январь куни Украина Президенти Владимир Зеленский Буюк Британия Бош вазири Кир Стармер билан Киевда бўлиб ўтган учрашув якунлари бўйича қўшма матбуот анжуманида Украинанинг НАТОга киришига Венгрия, Германия, Словакия ва АҚШ қаршилик кўрсатаётганини айтганди. Унинг сўзларига кўра, Киев тўрт давлат раҳбарияти билан альянсга қўшилиш мавзусида очиқ суҳбат ўтказган. Аммо бу давлатлар Украинанинг НАТОга қўшилишини хоҳламаслигини айтган.