Киевдаги “Ватан” монументидан СССР герби олиб ташланди
Олам
−
06 Август 2023 6724
Европадаги энг баланд ёдгорликлардан бири бўлган “Ватан” ҳайкалидаги совет герби ўрнига Украинанинг миллий рамзи бўлган уч қиррали найза (“Тридент”) ўрнатилди. Бу ҳақда “Униан.нет” хабар берди.
Маълум қилинишича, бугун, 6 август куни эрталаб уч қиррали найза ёдгорлик қалқонига кўтарилиши бошланган.
“Киевдаги “Ватан” монументига эрталаб Украина герби – Тридент ўрнатилди”, дейилади хабарда.
Герб ўрнатилгандан сўнг, қалқоннинг ташқи кўринишида косметик ишларни амалга ошириш режалаштирилган.
Маълумот учун, “Ватан” ёдгорлиги Иккинчи жаҳон уруши давридаги Украина тарихи миллий музейи ҳудудида жойлашган бўлиб, унинг очилиш маросими 1981 йилнинг 9 май санасида ўтказилган. СССРнинг ўша пайтдаги раҳбари Леонид Брежневнинг шахсан ўзи монументни очиб берган.
Шундан сўнг, Брежневга шаҳарнинг фахрий фуқароси унвони берилган. 102 метрли ҳайкал зангламайдиган пўлатдан ясалган бўлиб, унинг оғирлиги тахминан 25-30 тоннани ташкил қилади. Ҳайкал баландлиги бўйича Европада тенгсиз ҳисобланади. Эндиликда унинг қалқонидаги СССР герби Украина давлат рамзи – Тридентга алмаштирилиши кўзда тутилган.
Live
Барчаси
