Киевда Россия ҳужуми оқибатида ўзбек ресторани вайрон бўлди (видео)

Жорий йил 2 июлга ўтар кечаси Россиянинг Киевга уюштирган ҳаво ҳужуми оқибатида шаҳардаги “Ўзбек палови” ресторани жиддий зарар кўрди. Бу ҳақда рестораннинг Instagram саҳифасида эълон қилинди.

Қайд этилишича, Киевнинг Гарматна кўчасидаги филиалга зарба берилиши ортидан ёнғин келиб чиққан. Оқибатда рестораннинг бир хонаси бутунлай ёниб кетган, қолган қисмларига эса қисман шикаст етган. Шунга қарамай, тармоқнинг Дегтярёвская ва Лукянивская кўчаларида жойлашган бошқа филиаллари одатдаги тартибда фаолиятини давом эттирмоқда.

Қурбонлар ва жароҳат олганлар ҳақида маълумот берилмаган.

Ресторан Киевда 2024 йилда иш бошлаган бўлиб, мазкур жой ўзбек миллий таомлари, жумладан палов, сомса ва кабоблари билан машҳур.

Эслатиб ўтамиз, 2022 йилда Россиянинг Украинага кенг кўламли ҳужумлари оқибатида мамлакатнинг Чугуев шаҳрида маҳаллий аҳолига палов тарқатиб юрган 36 ёшли ўзбекистонлик Сардор Ҳакимов ракета зарбаси оқибатида ҳалок бўлганди.