Кимнинг улкан кемаси қулагани учун амалдорлар ҳибсга олинди

Шимолий Кореяда Меҳнат партияси марказий қўмитасининг мудофаа саноати бўлими раҳбар ўринбосари Ри Хён Сон ҳибсга олинди. Бу ҳақда Корея Марказий телеграф агентлиги хабар берди.

Маълумотга кўра, у жуда катта кўламдаги ҳодисага айбдор деб топилган.

Қолаверса, Чхончжин кемасозлик заводининг уч нафар ходими ҳам ҳибсга олинган. Улар орасида бош муҳандис Кан Чон Чор, корпус йиғиш цехи бошлиғи Хан Гён Хак ҳамда маъмурий ишлар бўйича директор ўринбосари Ким Ён Хак бор.

Ри Хён Сон эса мазкур воқеа муносабати билан ҳибсга олинган энг юқори лавозимли амалдор бўлган.

Британия телерадиокомпаниясининг маълумотларига кўра, амалдор КХДР ҳарбий сиёсатини ишлаб чиқиш ва амалга оширишда иштирок этган.

Маълумот учун, ағдарилиб кетган эсминец – КХДРнинг энг йирик ҳарбий кемаларидан бири бўлиб, 5 минг тонналик сув сиқиб чиқариш қувватига ва ўнлаб ракеталарни олиб юриш ҳамда\ учириш имкониятига эга.

Эслатиб ўтамиз, ушбу воқеа жорий йилнинг 21 май куни Шимолий Кореянинг Чонгжин портида бўлиб ўтган сувга тушириш маросими чоғида содир бўлганди. Янги қурилган 5 минг тонналик эсминец мувозанатини йўқотган ва кема пастки қисмидан шикастланган. Ушбу ҳолат маросимда қатнашган мамлакат етакчиси Ким Чен Иннинг ғазабига сабаб бўлган. У ҳодисанинг барча жараёнларини кузатган ва жиддий баҳо берган. Ким Чен Ин ҳарбий расмийлар, олимлар ва кемани қурувчи завод ишчиларини мутлақ бепарволик ва масъулиятсизлик туфайли юзага келган жиддий фалокат ва жиноятда айблаб, июнь охирида бўлиб ўтадиган партия йиғилишида уларнинг “масъулиятсиз хатоларини” муҳокама қилишни талаб қилган.