Ким янги ракеталарини синовдан ўтказди

Шимолий Корея кеча, 20 март куни янги зенит-ракета тизимининг синов парвозини амалга оширди. Бу ҳақдаги суратларни Корея марказий ахборот агентлиги эълон қилди.

Қайд этилишича, парвоз жараёнини КХДР раҳбари Ким Чен Ин ва Марказий ҳарбий комиссиянинг асосий аъзолари кузатиб борган. Ким Чен Ин ушбу синов натижасида Шимолий Корея “яна бир муҳим мудофаа қуроли билан таъминланганини” таъкидлаган.

“КХДР ракета қурилиш бош бошқармаси 20 март куни янги зенит-ракета тизимининг комплекс жанговар хусусиятларини текшириш учун парвозини ўтказди. Аниқланишича, янги ҳаво ҳужумига қарши ракета тизимининг тезкор ҳаракат қилиш қобилияти юқори бўлиб, бутун тизимнинг ишончлилиги жуда юксак даражада”, дейилади расмий баёнотда.

Эслатиб ўтамиз, аввалроқ, февраль ойининг охирида Шимолий Корея стратегик қанотли ракеталар синов парвозини ҳам ўтказган эди. Ўшанда Ким Чен Ин ракеталар 1587 км масофани босиб ўтиб, белгиланган нишонга аниқ етиб борганини билдирган. У мазкур синовнинг асосий мақсади “хавфсизлик муҳитига жиддий таҳдид солаётган ва кескинликни кучайтираётган душманларни огоҳлантириш”, шунингдек, “ядровий қуролларнинг қўллашга тайёрлигини намойиш қилиш” эканини таъкидлаган эди.