Ким қизини Украинадаги уруш қурбонлари шарафига қурилган кўчага олиб борди

Кеча, 15 февраль куни Ким Чен Ин Россия–Украина уруши пайтида ҳалок бўлган шимолий кореялик аскарлар оилалари учун Пхеньянда қурилган янги уйларнинг очилиш маросимида иштирок этди. Бу ҳақда мамлакат ахборот агентлиги хабар берди.

Шунингдек, Шимолий Корея етакчиси “Саэппёл” деб номланган янги кўчанинг очилиш маросимида ҳам қатнашган. Тадбирда унинг қизи Ким Чжу Э ва бошқа расмийлар ҳам иштирок этган.

Ким Чен Ин нутқида янги кўча энг қадрли нарсаларини ҳимоя қилиш йўлида жонини фидо қилган аскарлар хотирасига ҳурмат ифодаси эканини таъкидлаган. У мазкур ҳудудни мамлакат фахри ва келажак авлодлар учун ўрнак манбаи деб атаган.

Агентлик маълумотига кўра, янги уйлар ҳалок бўлган аскарлар оилалари ҳамда хориждаги ҳарбий операцияларда қатнашган жангчилар учун мўлжалланган. Ҳукумат бу оилаларга имтиёзли шароит яратиш ва доимий ғамхўрлик кўрсатишни ваъда қилган.

Очилиш маросимидан сўнг Ким Чен Ин айрим оилаларнинг уйларига кириб, уларга ҳамдардлик билдирган.

Эслатиб ўтамиз, аввалроқ КХДР раҳбари Ким Чен Ин ўз қизи Ким Чжу Эни ворис сифатида тайинлашни режалаштираётгани ҳақида хабар берилганди.