Ким Чен Ин Шимолий Корея Президенти этиб қайта сайланди

Шимолий Корея етакчиси Ким Чен Ин яна Президент этиб қайта сайланди. Бу ҳақда KCNA ахборот агентлиги хабар берди.

Қайд этилишича, ушбу қарор мамлакат Олий халқ мажлисининг бир кун аввал бўлиб ўтган биринчи сессиясидан сўнг қабул қилинган. У 99,93 фоиз овози билан тасдиқланган, сайловда иштирок этиш даражаси эса 99,99 фоиз бўлган.

Пойтахт Пхеньянда ўтказилаётган йиғилишда социалистик конституцияга ўзгартириш ва қўшимчалар киритиш, шунингдек, Давлат ишлари комиссияси раиси ва бошқа давлат раҳбарлик органларини сайлаш масалалари кўриб чиқилади.

Олий халқ мажлиси Шимолий Кореяда давлат сиёсатини расман тасдиқловчи орган ҳисобланиб, одатда ҳукмрон Меҳнат партияси қурултойидан кейин йиғилади ва партия қарорларини қонун даражасига олиб чиқади. Йиғилишда, қолаверса, февраль ойида бўлиб ўтган тўққизинчи партия қурултойида эълон қилинган мамлакатнинг беш йиллик иқтисодий режаси ҳам кўриб чиқилади.

Ким Чен Иннинг Жанубий Кореяга нисбатан “икки душман давлат” сиёсатини расмийлаштириш учун конституциясини қайта кўриб чиқадими ёки йўқми мавзуси диққат марказида бўлмоқда. У сўнгги йилларда Корея яриморолини тинч йўл билан бирлаштириш ғоясидан воз кечиб, Жанубни душман давлат сифатида қайта эълон қилган.

Ким Чен Иннинг синглиси Ким Ё Жонг эса Давлат ишлари комиссияси аъзолари рўйхатида кўринмаган. У 2021 йилдан буён ушбу таркибда фаолият юритиб келаётган эди.

Жанубий Кореянинг Бирлашув вазирлиги унинг рўйхатда йўқлиги сабабларини ўрганаётганини маълум қилган. Таҳлилчиларга кўра, бу ҳолат унинг таъсири камайганини англатмайди. Аксинча, бу стратегик вазифалар тақсимоти бўлиши мумкин. Сабаби у ҳукмрон партияда юқори лавозимда ишлашда давом этиб, сиёсатни мувофиқлаштиришда муҳим роль ўйнаши мумкин.

Эслатиб ўтамиз, аввалроқ Шимолий Корея етакчиси Ким Чен Ин Меҳнат партияси бош котиби лавозимига қайта сайланганди.