Ким Чен Ин Пхеньянда Шойгу билан учрашди

КХДР етакчиси Ким Чен Ин кеча, 21 март куни Пхеньянда Россия Хавфсизлик кенгаши котиби Сергей Шойгу билан учрашди. Бу ҳақда Корея марказий ахборот агентлиги хабар берди.

“Ҳурматли ўртоқ Ким Чен Ин олти ойдан сўнг Пхеньянда ўртоқ Сергей Шойгу билан яна учрашганидан хурсанд бўлди, суҳбат ишончли ва илиқ муҳитда ўтди. Ўртоқ Шойгу ўртоқ Ким Чен Инга Россия Президенти Владимир Путиннинг муҳим шахсий хабари ва саломини ҳурмат билан етказди. Ўртоқ Ким Чен Ин чуқур миннатдорлик билдирди ва ҳурматли ўртоқ Владимир Путинга ҳарбий саломларни етказди”, дейилади агентлик хабарида.

Шимолий Корея етакчиси Ким Чен Ин Россия Хавфсизлик кенгаши котиби Сергей Шойгу билан учрашувда Россия халқига “ғалабалар, фаровонлик ва бахт” тилади.

“У рус халқига ўз йўлида доимо фақат ғалаба, фаровонлик, бахт ва омад тилаб, Россия Федерациясининг муҳтарам президенти Владимир Владимирович Путинга, Россия ҳукумати, армияси ва халқига самимий тилакларимни етказишни сўради”, деб хабар беради агентлик.

Шу билан бирга, Ким Чен Ин Украинадаги босқинни “Россия халқининг букилмас кучининг намоёни” деб атади.

Учрашувда томонлар, шунингдек, икки мамлакат расмийларининг “Ҳар томонлама стратегик шериклик тўғрисидаги шартнома моддаларини сўзсиз амалга ошириш”га тайёрлигини ҳам муҳокама қилди.

Ким Чен Ин ва Шойгу “барча соҳалар, жумладан, хавфсизлик бўйича ҳамкорлик ва алмашинувларни янада мустаҳкамлаш бўйича истиқболли лойиҳалар”ни муҳокама қилди.

“Жорий йил икки томонлама кенг кўламли тадбирлар ва алоқаларни ўтказиш, жумладан, май ойида Улуғ Ватан урушидаги Ғалабанинг 80 йиллиги ва август ойида Корея озодлигининг 80 йиллигини нишонлаш нуқтаи назаридан кам бўлмаган воқеаларга бой бўлишини ваъда қилмоқда. Ишончим комилки, биз бу тадбирларни муносиб нишонлаймиз”, деб таъкидлади Россия Федерацияси Хавфсизлик Кенгаши котиби.